Sarrazin në Kosovë, e cilëson kriminal e terrorist sulmin ndaj Policisë së Kosovës

Emisari i Gjermanisë për Ballkanin Perëndimor, Manuel Sarrazin, ka qëndruar të hënën në Kosovë. Gjatë ditës, ka takuar udhëheqësit e institucioneve si dhe të partive opozitare. Pas takimit me kryeministrin Albin Kurti, shprehu solidaritetin dhe ngushëllimet për vrasjen e zyrtarit policor, ndërkohë bëri thirrje që sa më parë të gjendet një zgjidhje për zbatimin e marrëveshjes së dakorduar me Serbinë. Për këtë tha se do të angazhohet edhe emisari Miroslav Lajçak

Kriminal e terrorist e ka vlerësuar emisari i Gjermanisë për Ballkanin Perëndimor, Manuel Sarrazin, sulmin ndaj Policisë së Kosovës.

Sarrazin, të hënën, u takua me kryeministrin Albin Kurti, të cilit tha sa ia ka shprehur solidaritetin dhe ngushëllimet për vrasjen e policit të dielën në Banjskë të Zveçanit.

“Dje pamë një situatë të tmerrshme. E dënojmë fuqishëm këtë sulm kriminal dhe terrorist ndaj Policisë së Kosovës. Jemi këtu për të shprehur solidaritetin dhe ngushëllimet për familjarët e zyrtarit policor të Kosovës e gjithë shtetin”, ka theksuar Sarrazin.

Emisari gjerman ka bërë thirrje që të gjendet sa më parë një zgjidhje për zbatimin e marrëveshjes së dakorduar me Serbinë.

“Është e qartë se nëse dëshironi ta zgjidhni çështjen e sigurisë në kohë afatgjate ne duhet të kemi një dialog të suksesshëm dhe përfshirja në dialog dhe normalizimi midis Kosovës dhe Serbisë mund të jetë një ndër gurët e themelit të zhvillimit në të ardhmen. Nuk duhet ta ndalojmë këtë tani, ne duhet ta vazhdojmë më tutje, të mundohemi të gjejmë një zgjidhje që të zbatojmë marrëveshjen e Ohrit dhe të kemi një dialog të suksesshëm”, ka deklaruar Sarrazin.

Ai gjatë së hënës është pritur edhe nga presidentja Vjosa Osmani si dhe nga liderët e partive opozitare.

Për gjetjen e një rruge përpara, ka thënë se do të angazhohet edhe emisari i Bashkimit Evropian për dialogun, Miroslav Lajçak.

Edhe Arbëri 1 tet 2023 Kurti në takim me Sarrazinin kërkon që Serbia të ndëshkohet ndërkombëtarisht

Sulmin ndaj Policisë së Kosovës e ka cilësuar akt frikacak e në kundërshtim me parimet e paqes dhe të bashkëpunimit.

“Ky sulm i tmerrshëm thekson më tej domosdoshmërinë e diplomacisë dhe dialogut parandalues, nënvizuar gjatë javës së kaluar, kur mora pjesë në javën e nivelit të lartë të Asamblesë së Përgjithshme të OKB-së në Nju Jork. Në margjinat e OKB-së, fola me drejtues dhe kolegë të shumtë nga e gjithë bota. Në një mënyrë apo tjetër, të gjithë theksuam rëndësinë e dialogut dhe bashkëpunimit”, ka shkruar Lajçak.

Në orët e para të së dielës, Policia e Kosovës u sulmua nga një grup i armatosur serbësh, ku u vra rreshteri Afrim Bunjaku, ndërkohë dy policë të tjerë u lënduan.