PDK-ja akuzon LVV-në për fshehje provash që lidhen me rezervën shtetërore

Ligjvënës të partisë në pushtet dhe të subjekteve në opozitë kanë shkëmbyer akuza në mbledhjen e Komisionit Hetimor për rezervën shtetërore. Në të është shprehur edhe pretendimi se po fshihen provat që lidhen me skandalin

Deputetë të opozitës kanë akuzuar të enjten pushtetin për fshehjen e provave që kanë të bëjnë me procedurat e furnizimit dhe menaxhimit të rezervave shtetërore.

Në mbledhjen e Komisionit Hetimor për çështjen e rezervës shtetërore, deputeti i PDK-së, Rashit Qalaj, i cili e drejton komisionin, ka akuzuar deputetin e Vetëvendosjes për ndërhyrje në punët e Ministrisë së Tregtisë.

“Kemi pranuar një e-mail nga deputeti i Vetëvendosjes, Halit Thaçi, i cili e-mail u është dërguar të gjithë anëtarëve të komisionit dhe që në CC i është dërguar edhe ministres Rozeta Hajdari dhe disa personave tjerë që kanë pozita, që konsideroj që është ndërhyrje në punët e ministrisë. Kishte me qenë në rregull që vërejtjet t’u dërgohen anëtarëve të komisionit, por jo Ministrisë. Unë këtë e konsideroj si një sinjal që t’i thuhet Ministrisë, mos i sjell dokumentet”, ka thënë Qalaj.

Deputetët shprehën brengën edhe për mungesë informacioni nga Prokuroria Speciale se deri ku mund të interferojnë deputetët gjatë hetimit që do ta realizojë komisioni.

Deputeti i Vetëvendosjes, Halit Thaçi, dhe ai i PDK-së, Ferat Shala, polemizuan rreth anësisë në proces.

Edhe Arbëri 21 pri 2026 Opozita akuzon Vetëvendosjen për dallavere me rrymën

“Ne mund të kërkojmë kontrata për blerjen e grurit për kohën e caktuar, por nëse duam vetëm një kontratë të një operatori, atëherë për mua është tendencioze. Deputeti Shala, pse nuk kërkove të gjitha kontratat për blerjen e vajit? A e kam të drejtën të them se ti po e fsheh dikë aty?”, ka thënë deputeti Thaçi.

Ky ligjvënës i LVV-së ka marrë kundërpërgjigje nga Shala i PDK-së.

“Unë kam shkruar për dilemat ku i kam pasë, dyshimet ku unë i kam pasë. I kam ngritë edhe në Kuvend me emër operatorët, secilin. Kjo qeveri dyshoj dhe tashmë është i bazuar dyshimi im që nuk e ka sjellë vajin. Shkruaj ti nëse di të tjerat”, ka thënë Shala.

Në Komision nuk munguan as akuzat drejtuar njëri-tjetrit.

“Edhe ne e kemi detyrë, por edhe të tjerët, kur po i mbroni ata të korruptuarit e tjerë që po flitet, Martin Berishaj, partia jote e ka mbrojtur, këtu po reagoni për pyetje, dokumentacione, edhe po më shitni moral mu. Absolutisht është e papranueshme... Punoni për ta zbardhur të vërtetën”, ka thënë Valentina Bunjaku-Rexhepi, deputete e LDK-së.

Asaj i ka reaguar Driton Hyseni, deputet i LVV-së.

Edhe LAJMET E MBRËMJES 28 mar 2024 LVV-ja kushtëzon opozitën që të përcaktohet për zgjedhje nëse do komision hetimor

“Nuk kam nevojë unë për të dhënë moral. Pate t’i pretendime ndaj neve dhe unë veç jam sqaruar”, ka thënë ai.

Komisioni hetimor i Kuvendit është krijuar për të hetuar çështjen e furnizimit me rezervën shtetërore, pas dyshimeve se mungon një pjesë e mallit të kontraktuar.