Normalizimi i raporteve me Serbinë mund të bëhet vetëm nëpërmjet njohjes së ndërsjellë, tha kryeministri Albin Kurti, gjatë pjesëmarrjes në Forumin Ekonomik, që u organizua në Shkup. Qëndrimin e ka shprehur një ditë pasi në Bruksel, zëdhënësi i BE-së, Peter Stano, theksoi se dialogu për normalizimin e raporteve mes Kosovës dhe Serbisë nuk e ka qëllim njohjen.
Kryeministri Albin Kurti është kundërpërgjigjur një ditë pasi nëpërmjet zëdhënësit Peter Stano, Bashkimi Evropian shprehu qëndrimin se procesi i normalizimit të marrëdhënieve mes Kosovës dhe Serbisë nuk e ka për qëllim njohjen.
Tek ka folur në një panel në kuadër të Forumit Ekonomik, që u organizua të mërkurën në Shkup, Kurti tha se nuk mund të ketë normalizim pa njohje të ndërsjellë.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo“Normalizimi i marrëdhënieve mund të bëhet me njohje të ndërsjellë si pjesë qendrore. Kjo është thënë nga presidenti Biden, nga sekretari Blinken, nga kancelari Scholz, që njohja e ndërsjellë është esenca, pjesa qendrore e normalizimit të plotë të marrëdhënieve, për të cilën jemi duke u munduar me shumë zell ta ndërtojmë dhe të vazhdojmë tutje”, ka thënë Kurti.
Të hënën kryeministri i Kosovës dhe presidenti i Serbisë shprehën pajtimin për planin evropian mbi dialogun, dokument që, sipas Kurtit, nënkupton njohjen de facto. Përfaqësuesit e të dyja shteteve nuk u dakorduan edhe për udhërrëfyesin për zbatimin e këtij plani, e marrëveshja për të cilin synohet të mbërrihet më 18 mars, në një takim që pritet të zhvillohet në Maqedoninë e Veriut.
Kryeministri Kurti foli në Shkup edhe për simbolikën e përzgjedhjes së këtij vendi për nënshkrimin e mundshëm të marrëveshjes.
“Mos të harrojmë se më 9 qershor të vitit 1999 në Kumanovë u nënshkrua kapitullimi i Jugosllavisë së Millosheviqit dhe hyrja e forcave të NATO-s. Mendoj se këto elemente simbolike të Maqedonisë së Veriut ishim të rëndësishme për përfaqësuesin e lartë të BE-së, Josep Borrell, që të na ftojë në Maqedoni për takimin e radhës të nivelit të lartë”, ka shtuar Kurti.
Kryeministri Kurti ka treguar se gjatë ditës ka pasur takim edhe me homologun e tij të Maqedonisë së Veriut, Dimitar Kovaçevski, dhe me atë të Malit të Zi, Dritan Abazoviq, me të cilët tha se ka diskutuar për bashkëpunim rajonal.