Kurti: Kërkesat e Vuçiqit, joracionale dhe aspak paqësore

“Kërkesat e tij, masat e tij bëhen nga një dëshpërim dhe paraqesin joracionalitet e nuk janë aspak paqësore por, përkundrazi, pjesë e fushatës agresive për konflikte të reja që pa dyshim nuk kanë vend as në Kosovë”, ka thënë kryeministri Kurti

Kryeministri Albin Kurti ka deklaruar të martën se masat e listuara nga presidenti i Serbisë, Aleksandar Vuçiq, për Kosovën janë pjesë e fushatës agresive për konflikte të reja. 

“Kërkesat e tij, masat e tij bëhen nga një dëshpërim dhe paraqesin joracionalitet e nuk janë aspak paqësore por, përkundrazi, pjesë e fushatës agresive për konflikte të reja që pa dyshim nuk kanë vend as në Kosovë”, ka thënë kryeministri Kurti.

Ndërkaq teksa përmendi tri të vetat ndaj Serbisë, që i publikoi në Bruksel si kushte për takim me Vuçiqin, shefi i ekzekutivit u shpreh se ato janë racionale e paqësore.

“Së pari duhet të flisni për tri kushtet që i kam vënë unë e që janë kushte paqësore dhe racionale. Do të thotë janë: Dorëzimi në autoritetet kosovare i Milan Radoiçiqit, është nënshkrimi i Marrëveshjes dhe është gjithashtu tërheqja e letrës së ish-kryeministres Bërnabiq, e cila tha që nuk e pranon as pavarësinë e Kosovës, as ulësen në OKB për Kosovën dhe as nuk e respekton integritetin territorial të Kosovës. Ato tri kushte janë paqësore dhe racionale”, ka thënë Kurti.

Në mesin e masave Vuçiqi ka përmendur shpalljen e Kosovës përmes ligjit “zonë të posaçme sociale”, pastaj rezistencë të institucioneve paralele e hapje të zyrave afër kufirit me Kosovën për t’u ofruar shërbime qytetarëve të veriut. 

Pos masave, në konferencën e së premtes Vuçiqi prezantoi edhe disa kërkesa ndaj Kosovës.
Ai kërkoi mbajtjen e zgjedhjeve të reja në veri, kthimin e policëve, gjyqtarëve e prokurorëve serbë të dorëhequr, tërheqjen e njësive speciale nga veriu, formimin e Asociacionit, lirimin e të burgosurve dhe kryerjen e pagesave me dinarë.

E Ambasada amerikane në Prishtinë u ka bërë thirrje palëve ta shmangin retorikën përshkallëzuese dhe ka shprehur qëndrimin se Kosova është shtet i pavarur, të cilin SHBA-ja dëshiron ta shohë tërësisht të integruar në strukturat euroatlantike.

“Shtetet e Bashkuara të Amerikës vazhdojnë të përkrahin fuqishëm dialogun e lehtësuar nga BE-ja, në mes të Kosovës dhe Serbisë si rrugë për të arritur raporte paqësore dhe produktive mes dy shteteve. E ardhmja e të dyja shteteve është në institucionet evropiane; procesi i lehtësuar nga BE-ja është rruga e vetme përpara. U bëjmë thirrje sërish Serbisë e Kosovës të përmbahen nga retorika e mëtejme përshkallëzuese, veprimet e pakoordinuara apo aktet legjislative që bien ndesh me normalizimin e raporteve apo rrezikojnë stabilitetin dhe sigurinë”, thuhet në përgjigje me shkrim të Ambasadës. “Kosova është shtet sovran, i pavarur dhe multietnik, të cilin ne duam ta shohim tërësisht të integruar në strukturat euroatlantike dhe ndërkombëtare”.

Kërkesat dhe masat Serbia i ka paralajmëruar si përgjigje ndaj veprimeve të institucioneve të Kosovës për shtrirjen e sovranitetit në veri.