-
Nga:
Sanie Jusufi
- 21 maj 2025 19:21
- Shpërndaje në:
Në shoqërinë civile kanë ngritur shqetësimin lidhur me vendimmarrjen e Qeverisë në detyrë. Hulumtues të GLSP-së kanë thënë se nga 9 shkurti deri më tani janë marrë 93 vendime e 30 prej tyre në kundërshtim me Ligjin për Qeverinë. Sipas kësaj organizate, në mesin e vendimeve janë edhe emërimet në pozita të rëndësishme publike
Grupi për Studime Juridike dhe Politike (GLSP) ka vlerësuar se Qeveria në largim ka marrë 30 vendime të kundërligjshme, nga dita e zgjedhjeve nacionale e deri këtë të mërkurë.
Në një konferencë për media Blerina Istrefi, menaxhere e projektit në GLPS, theksoi se këto vendime janë të papranueshme, dhe ka prezantuar arsyet pse ato cilësohen të jashtëligjshme.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo“Nga data 9 shkurt 2025 (dita e zgjedhjeve v.j.) e deri më 27 mars 2025 (dita e certifikimit të rezultateve nga KQZ v.j.), qeveria në largim ka mbajtur 7 mbledhje dhe ka marrë 76 vendime. Marrë parasysh kufizimet që i njeh ligji në situatat kur kemi të bëjmë me qeveri në largim, GLPS vlerëson se 13 nga këto vendime janë të kundërligjshme për shkak se janë marrë duke i tejkaluar kufizimet në kuadër të nenit 31 të Ligjit për Qeverinë. Kurse vendimet e tjera janë në kuadër të punëve të përditshme dhe për shkak te vijueshmërisë normale të veprimtarisë ekzekutive”, ka thënë Istrefi
Sipas GLPS-së, vendimet tejkalojnë kufizimet që parasheh Ligji për Qeverinë.
Elona Kurti, koordinatore e projektit në GLSP, ka thënë se ligji është shkelur në vendimet që kanë të bëjnë me iniciativat për emërime në pozita të rëndësishme publike.
“Vendimet e kundërligjshme i përkasin natyrës së inicimit të procedurave të reja për emërimin në pozitat publike, për emërimin e të cilave është kompetente në bazë të ligjeve të përfshira, por duke mos u kufizuar në themelimin e komisioneve ad-hoc për pozitat: Kryeinspektor shëndetësor në Inspektoratin Shëndetësor; drejtor i përgjithshëm në Agjencinë e Punësimit të Republikës së Kosovës, drejtor i përgjithshëm i Institutit të Kosovës për Administratë Publike, drejtor ekzekutiv i Agjencisë së Regjistrimit Civil, drejtor i përgjithshëm i Akademisë së Kosovës për Siguri Publike, drejtor i përgjithshëm i Agjencisë për Shoqërinë e Informacionit, drejtor ekzekutiv i Agjencisë për Siguri Kibernetike dhe drejtor ekzekutiv i Agjencisë së Kosovës për Forenzikë”, ka thënë Kurti.
Përveç këtyre, GLSP-ja ka konstatuar se Qeveria në detyrë ka marrë edhe vendime të tjera në kushte të papajtueshmërisë me kërkesat e ligjit. Kjo organizatë, si të kundërligjshme i konsideron edhe vendimet me të cilat Qeveria në largim, pavarësisht kufizimeve, i ka marrë lidhur me miratimin e koncept-dokumenteve dhe strategjive, të tilla si: Dokumenti Strategjik dhe Plani i Veprimit për Ndërhyrjen në Fëmijërinë e Hershme – NFH (early childhood intervention-eci) 2025-2030, Koncept-dokumenti për Shëndetin e Bimëve, Koncept-dokumenti për Bujqësi Organike e të tjera.
E që nga 27 marsi kur janë certifikuar emrat e deputetëve, sipas GLPS-së janë mbajtur tri mbledhje të Qeverisë me zyrtarë që ishin edhe me post ekzekutiv (ministra), por edhe ishin certifikuar si deputetë.
Sipas GLPS-së, të gjitha vendimet janë në kundërshtim me Kushtetutën, pasi konsideron se mbajtja njëkohshëm e dy funksioneve, edhe në ekzekutiv e edhe në legjislativ, përbën shkelje.
“Në këto takime janë marrë gjithsej 17 vendime, nga një kabinet qeveritar i cili në përbërjen e tij ka pasur kryeministër e ministra që në kundërshtim me nenin 72 të Kushtetutës kanë prezantuar dhe kanë qenë pjesë e vendimmarrjes. Rrjedhimisht kjo nënkupton që secili nga këto vendime është i kundërligjshëm sepse është marrë nga një përbërje e ekzekutivit në kundërshtim me aktin më të lartë juridik”, ka thënë koordinatorja Kurti.
Në këto mbledhje janë marrë 17 vendime, dhe GLPS-ja ka rekomanduar që të mos merren më vendime nga përbërja aktuale e kabinetit qeveritar, dhe që secili vendim të merret me përbërje legjitime.
Lidhja Demokratike e Kosovës më 8 maj ka dorëzuar në Prokurorinë Speciale kallëzim penal ndaj kryeministrit në detyrë Albin Kurti dhe anëtarëve të qeverisë në detyrë, që janë zgjedhur edhe deputetë. Sipas LDK-së ata janë duke e shkelur ligjin.