Kuvendi i Kosovës sërish nuk ka arritur ta miratojë projektligjin për fertilizimin e asistuar mjekësor, si pasojë e përcaktimit të disa deputetëve të pushtetit. Kjo nxiti polemika mes deputetëve të LVV-së. Legjislativi kaloi një numër projektligjesh pa votat e deputetëve të partive opozitare, derisa pushteti tërhoqi nga shqyrtimi në lexim të dytë Projekt-kodin doganor dhe të akcizave
Pa përkrahjen edhe të disa deputetëve të pushtetit, Projektligji për shëndetin riprodhues dhe fertilizimin e asistuar mjekësor ka dështuar për të disatën herë të kalojë në Kuvend.
Shqyrtimi e votimi i tij u vendos të mos procedoheshin më tej në seancën e së enjtes, pasi nuk kaloi amendamenti i njërit prej deputetëve kundërshtues të projektligjit, për mungesë kuorumi.
Në këtë amendament të deputetit Visar Korenica kërkohej që e drejta për të pasur fëmijë të mos u jepet individëve, por vetëm çifteve.
“Neni 3 paragrafi 11 kërkojmë që e drejta riprodhuese t’i takojë çiftit që të vendosin lirshëm nëse duan të kenë fëmijë. Jo t’i jepet e drejta individit, por të përcaktohet e drejta te çiftet”, deklaroi ai gjatë propozimit.
Me këtë projektligj synohet të rregullohen organizimi dhe përgjegjësia institucionale për dhënien e kujdesit shëndetësor të sigurt dhe cilësor në fushën e shëndetit riprodhues. Sipas tij, parashihet që të drejtën e shfrytëzimit të IVF-së ta kanë edhe gratë e pamartuara, mbi 18 vjeç, që janë në gjendje të mirë shëndetësore e sociale dhe janë të afta “për fertilizim dhe për përkujdesje prindërore”.
Edhe
Nuk kalojnë draft-rezolutat e opozitës
Por në seancë votimi i amendamentit dështoi, meqë nuk mori pjesë deputeti i Vetëvendosjes, Eman Rrahmani. Atij kryetari i Kuvendit, Glauk Konjufca, ia ngarkoi përgjegjësinë e bllokimit të projektligjit.
“Nuk kemi kuorum, sepse një deputet qëllimshëm nga mazhoranca nuk po voton për ta pamundësuar që fare ligji të mos procedohet”, u shpreh kryetari.
Kjo nxiti polemikë mes kryeparlamentarit e deputetit Rrahmani, i cili i kërkoi Konjufcës t’ia përmendë edhe emrin, meqë dha vlerësime mbi qëndrimet e tij.
Qasja e Konjufcës u vlerësua e padrejtë edhe nga ish-deputeti i LVV-së, Haki Abazi. Por kryeparlamentari u arsyetua për deklaratën dhe tha se liria e votës i takon secilit.
“Kjo është për ta kuptuar teknikisht pse nuk po ndodh. Deputetët e kanë shpjeguar secili pozicionin e vet, nuk kemi nevojë t’i gjykojmë fare. Këto janë përcaktime të lira se qysh duan deputetët. Teknikisht pse jemi 60 është kjo”, ka thënë ai.
Edhe
Tre deputetë të pushtetit s’marrin pjesë në votim, në mungesë të kuorumit shtyhet seanca
Meqë kuorumi nuk u bë, ligji u shty për një seancë tjetër.
E kjo seancë që në rend dite pati 30 pika u përcoll edhe me shumë probleme në konstatim të votave. Mungesa e votimit elektronik bëri që votimi me dorë i disa projektligjeve të përsëritej. Probleme të vazhdueshme pati edhe me pajisjet për diskutim.
Që në fillim të seancës, Partia Demokratike e Kosovës e tërhoqi nga rendi i ditës shqyrtimin e Projekt-rezolutës për adresimin e çështjes së emigrimit të qytetarëve nga Kosova, me arsyetimin se deputetët e partisë mungojnë për shkak të udhëtimeve zyrtare.
E pushteti e tërhoqi nga shqyrtimi në lexim të dytë Projekt-kodin doganor dhe të akcizave. Kuvendi miratoi një numër projektligjesh si atë për Këshillin e Sigurisë, Projektligjin për noterinë, për rininë, projektligjin për regjistrin e pronarëve përfitues e projektligjin për ndryshimin e ligjeve që përmbajnë procedura të administrative dhe harmonizimin e tyre me Ligjin për procedurën e përgjithshme administrative.
Po ashtu me mbështetjen e deputetëve të AAK-së, Kuvendi miratoi në lexim të parë Projektligjin për kontrollin e kufirit shtetëror. Ministri i Punëve të Brendshme, Xhelal Sveçla, u shpreh se me të fuqizohen kompetencat e policisë në lidhje me kontrollin e kufirit.
Edhe
Vazhdon të shtyhet votimi i Projektligjit për shëndetin riprodhues
“Ky projektligj është një ndër ligjet më të rëndësishme në sektorin e sigurisë, pasi ndikon drejtpërdrejt në sigurinë dhe mirëqenien territoriale të vendit tonë. Projektligji ka rol jetik në mënyrën si menaxhohet kontrolli dhe mbikëqyrja e kufirit shtetëror, duke vendosur kompetencat e policisë në lidhje me kontrollin e kufirit dhe bashkëpunimin me organet shtetërore, të përfshira në menaxhimin e kufirit. Qëllimi te jetë i qartë, të garantojë sigurinë tonë dhe të sigurojë kontrollin efektiv të kufijve tanë shtetërorë”, ka thënë Sveçla.
Seanca, që ishte vazhdim i disa të tjerave, sërish mbeti në gjysmë për mungesë kuorumi. Pa trajtim mbetën më shumë se dhjetë pika.
