Kuvendi i Kosovës është zhytur në bllokadë. Për shkak të mungesës së kuorumit, Kryesia e Kuvendit as të hënën nuk ka mundur të vendosë për caktimin e seancës. Megjithëkëtë, deputetët do të mblidhen këtë të mërkurë për t’i shqyrtuar 30 pikat e papërfunduara nga seancat e kaluara. Për situatën e krijuar pushteti dhe opozita kanë fajësuar njëra-tjetrën.
Kryetari i Kuvendit, Glauk Konjufca, ka thënë se punën e legjislativit po e vështirëson refuzimi i opozitës për të marrë pjesë në votime, për shkak të kushtëzimit me zhbllokimin e të hyrave vetjake të komunave.
“Situata mund të zgjidhet edhe me kërkesën që e kanë vendosur si kusht për pjesëmarrje në punët normale të kuvendit nga ana e partive opozitave. Ata e kanë vendosur kusht çështjen e bllokimit të të hyrave vetjake të komunave dhe nëse kjo zgjidhet do të kemi punën shumë më të lehtë të Kuvendit. Krejt kjo sqarohet të hënën në mëngjes kur qeveria e ka mbledhjen dhe do të shohim nëse po e procedon atë plotësim-ndryshim të ligjit. Pastaj do të mundësohet që thesari të veprojë në drejtim të zhbllokimit të mjeteve, të cilat komunat pretendojnë se janë të tyre dhe janë edhe një e drejtë kushtetuese dhe nuk mund t’i marrë askush ato të hyra”, ka thënë Konjufca. Sipas tij, këto mjete janë bllokuar për shkak të një mënyre si është formuluar amendamenti në projektligjin për buxhetin, “kështu që nëse kjo çështje zhbllokohet ne e patëm premtimin nga opozita që do ta ndryshojnë qasjen e tyre”.
Por përfaqësues të opozitës kanë theksuar se përgjegjësia për ta bërë kuorumin i takon partisë që ka shumicën. Shefi i Grupit Parlamentar të Partisë Demokratike të Kosovës, Abelard Tahiri, ka fajësuar Qeverinë dhe kryeministrin Albin Kurti, për, siç ka thënë, mosreflektim sa i përket bllokimit të Kuvendit.
“Sikur të kishim një qeveri efektive, sikur të kishim një kryeministër më efektiv, bllokimi i Kuvendit do të reflektonte në punën e Qeverisë. Pra fakti që kryeministrit nuk i bën përshtypje fare, kësaj qeverie nuk i bën përshtypje fare që agjenda e Kuvendit është e bllokuar - mund të imagjinoni se në çfarë situate e kemi qeverisjen në vend”, ka thënë Tahiri. “Atyre nuk iu ecë asnjë projekt as në arsim, as në sundim të ligjit, as të shëndetësisë. Ekonominë në buzë të kolapsit me një inflacion jashtëzakonisht të madh, me paga që qytetarët nuk ia arrin t’ia dalin muaji, muajin. Opozita nuk është ajo që i bën numrat në Kuvend, sepse sikur t’i kishim numrat ne nuk do të ishim në opozitë, por në pozitë”.
Me kërkesë të mëhershme të Grupit Parlamentar të PDK-së do të zhvillohet një debat në lidhje me punën e Ministrisë së Tregtisë dhe Industrisë.
E Shefi i Grupit Parlamentar të Aleancës për Ardhmërinë e Kosovës, Besnik Tahiri, ka thënë se partia që përfaqëson ka planifikuar këtë javë të thërret interpelancë për ministrin e Financave, Hekuran Murati, lidhur me dy tema. E para, sipas tij, ka të bëjë me zhbllokimin e buxhetit për komunat dhe e dyta me sektorin publik.
“Zhbllokimi i Kuvendit mund të ndodhë vetëm në qoftë se qasja populiste e Qeverisë, përkatësisht e Ministrisë së Financave në raport me të hyrat vetjake të komunave përfundon këtë javë, për shkak se lëre që nuk po mund ta shfrytëzojë buxhetin që e ka bllokuar në konton e Qeverisë, por ajo dëshiron ende buxhet prej komunave që e kanë të vetmen mundësi për t’i zbatuar projektet që ndikojnë drejtpërdrejt në jetën e qytetarit”, ka theksuar Tahiri.
Për temën e dytë, Tahiri ka thënë se për fajin e Qeverisë zyrtarët publikë janë bërë rast social për shkak të ligjit që, sipas tij, i mashtroi punëtorët në administratën e shtetit duke i lënë me paga të ulëta.
“Bllokada që po ndodh me paranë publike, bllokada në Parlamentin e Kosovës, mosinvestimi dhe mostrajtimi i asnjë teme që lidhet me mirëqenien, i ka zhgënjyer njerëzit. Zhbllokimi i Kuvendit nuk është me fajin e opozitës. Zhbllokimi i Kuvendit mund të ndodhë vetëm në qoftë se ndryshon qasja e Qeverisë, respektivisht Ministrisë së Financave në raport me të hyrat vetjak të komunave të ndodhë”, ka thënë Tahiri.
Kontesti për 37.5 milionë eurot e bllokuara për komunat u diskutua javën e shkuar në takimin e përfaqësuesve lokalë me ata të Qeverisë. Zyrtarë qeveritarë insistojnë se me vendimin për kthimin e mjeteve të mbetura ndër vite në buxhetin qendror, vetëm i kanë zbatuar amendamentet që kanë kaluar në Kuvend.
© KOHA. Të gjitha të drejtat janë të rezervuara.
