Në 27 ka arritur numri i të arrestuarve për rastin “Brezovica”.
Aksioni, i nisur në fund të dhjetorit të 2021-tës, ka vazhduar këtë të enjte, me arrestimin e katër personave, në mesin e të cilëve, siç ka mësuar KOHA, edhe ish-sekretarit të Ministrisë së Infrastrukturës, Xhelil Bekteshi.
Hetimi i nisur në vitin 2019 e i zgjeruar gjatë 2020-s është bërë kryesisht për dhënien e lejeve të ndërtimit në Brezovicë dhe përfitimet që kanë pasur të dyshuarit.
Sipas prokurorit të rastit, Rasim Maloku, për këtë rast, në hetim janë 63 persona, derisa nga të arrestuarit, 12 gjenden në paraburgim, 3 janë në arrest shtëpiak dhe 8 me masë ndalimi për t’iu afruar vendit dhe personave.
Të enjten, Prokuroria Themelore në Ferizaj, nëpërmjet një njoftimi, ka dhënë detaje të operacionit.
“Prokuroria Themelore në Ferizaj njofton opinionin publik se në bashkëpunim me Policinë e Kosovës, Drejtorinë për Hetimin e Krimeve të Rënda, në bazë të urdhëresës së lëshuar nga Gjykata Themelore në Ferizaj për kontrollin e shtëpive dhe objekteve përcjellëse, sot kanë realizuar aksionin “Brezovica”, i cili është vazhdimësi e aksioneve të mëhershme, ku, me ç’rast janë kontrolluar dhe bastisur gjashtë lokacione të ndryshme dhe me vendim të prokurorit të shtetit janë ndaluar në kohëzgjatje prej 48 orësh, katër persona të dyshuar, në mesin e tyre edhe ish-sekretari i Ministrisë së Infrastrukturës në Prishtinë”, shkruhet në komunikatën e saj.
Në të është bërë e ditur njëkohësisht se katër personat e arrestuar dyshohet se kanë kryer veprat penale “Marrje e ryshfetit”, “Ushtrim i ndikimit” dhe “Dhënie e ryshfetit”.
“Personat e arrestuar me inicialet Xh.B., I.F., Xh.Sh., dhe B.P. janë ndaluar për shkak të dyshimit se të njëjtit kanë kryer veprat penale “Marrja e ryshfetit nga neni 428 paragrafi 1 lidhur me paragrafin 3 të Kodit Penal të Republikës së Kosovës, “Ushtrimi i ndikimit” nga neni 431 paragrafi 1 të KRPK-së dhe “Dhënia e ryshfetit” nga neni 429 paragrafi 1 lidhur me paragrafin 3 të KPRK-së”, shkruhet në vazhdim të saj.
Maloku ka konfirmuar se krahas të arrestuarve janë në kërkim edhe dy persona të tjerë.
Nga aksioni i zhvilluar në dhjetor të vitit të kaluar u patën vënë nën pranga 10 persona, në mesin e të cilëve edhe ish-kryetari i Komunës së Shtërpcës, Bratisllav Nikoliq, i cili dyshohej se ka fituar mbi një milion euro duke keqpërdorur pozitën zyrtare.
Ndërkaq, në janar u arrestuan shtatë persona të tjerë, dy prej tyre ish-zyrtarë të Ministrisë së Mjedisit, Planifikimit Hapësinor dhe Infrastrukturës që dyshohen për keqpërdorim të detyrës zyrtare, më saktësisht për marrje ryshfeti.
Ish-zyrtarë të arrestuar për rastin e njëjtë kishte edhe në vazhdimin e aksionit në mars të këtij viti. Nga aksioni i kryer në 12 lokacione të ndryshme, u arrestuan tetë persona, prej të cilëve tre ish-zyrtarë të MMPHI-së.
© KOHA. Të gjitha të drejtat janë të rezervuara.
