Fehmi Agani në studimet themelore kishte mbaruar për filozofi, ndërsa më vonë kishte zgjedhur specializimin për sociologji dhe sidomos sociologji politike. Në çdo vend e në çdo kohë reflekset nga këto fusha do të jenë thelbi i punës së tij, qoftë si gazetar e punonjës publik, apo si profesor nga më të shquarit e UP-së, si veprimtar shoqëror e politikan, shkruan sot Koha Ditore.
Në profesurën e tij universitare si profesor i sociologjisë dhe i sociologjisë politike, i logjikës dhe i metodologjisë së hulumtimit shkencor, po edhe i lëndëve të afërta me to; ishte themelues i Degës së Filozofisë e Sociologjisë në Universitetin e Prishtinës, po edhe një nga ndërtuesit kryesorë të Universitetit në tërësi. Në jetën shoqërore ishte ndër ata që pas Plenumit të Brioneve (1966) u shquan sa i përket angazhimit për demaskimin e shtypjes barbare të ushtruar mbi shqiptarët, edhe më shumë për kërkimin e hapësirave të reja për zgjerimin e të drejtave shoqërore dhe kombëtare të shqiptarëve me synim barazimin me të tjerët në ish-Jugosllavi, gjithë duke kërkuar hapësira demokratizimi për të gjithë.
Në ato vite (1967-8) nyjëtohet kërkesa për krijimin e Republikës së Kosovës të barabartë me republikat e tjera të Jugosllavisë. Fehmiu ishte ndër ata që e argumentuan dhe e ushqyen këtë kërkesë me tërë fuqinë e mendjes e të dijeve që kishin mbledhur në jetën e tyre.
Në ato kohë Kosova po rrëmbente një hapësirë politike brenda së cilës të drejtat e popullatës së saj dhe të drejtat e shqiptarëve duhej të ngriheshin në një nivel tjetër, dhe kjo hapësirë mund të bëhej reale nëse mbushej me zhvillimin e veprimtarive institucionale, politike, administrative, kulturore, shkencore etj. Në të gjitha këto drejtime të veprimit Fehmi Aganin e gjejmë diku në radhët e para. /Rexhep Ismajli
(shkrimin e plotë e gjeni në numrin e sotëm të Kohës Ditore)
