Papa Leo XIV iu drejtua artistëve dhe kuratorëve në Pallatin Apostolik të Vatikanit, duke u thënë se Kisha ka nevojë për ata dhe duke shtuar: “Kjo është veçanërisht e vërtetë në këtë epokë të inteligjencës artificiale, në të cilën kemi nevojë urgjente të dallojmë artin njerëzor nga ajo që prodhohet nga makinat”. Fjalimi u mbajt me rastin e ekspozitës “The Art of Possibility: Weaving Together”
Në një fjalim të mbajtur të premten në Vatikan, Papa Leo XIV u ka thënë artistëve dhe kuratorëve se Kisha ka nevojë për ata, veçanërisht në epokën e inteligjencës artificiale. Papa është shprehur pikërisht në një moment kur disa ekspertë po parashikojnë se inteligjenca artificiale mund ta ndikojë shumë njerëzimin brenda një dekade, dhe vetëm tri ditë pasi presidenti amerikan Donald Trump mblodhi në Shtëpinë e Bardhë disa prej arkitektëve kryesorë të botës të modeleve të avancuara të inteligjencës artificiale, për të nënshkruar një marrëveshje për vetërregullim.
Papa iu drejtua artistëve dhe kuratorëve në Pallatin Apostolik të Vatikanit, duke u thënë se Kisha ka nevojë për ata dhe duke shtuar: “Kjo është veçanërisht e vërtetë në këtë epokë të inteligjencës artificiale, në të cilën kemi nevojë urgjente të dallojmë artin njerëzor nga ajo që prodhohet nga makinat”. Fjalimi u mbajt me rastin e ekspozitës “The Art of Possibility: Weaving Together”, të organizuar nga Dikasteri i Vatikanit për Kulturën dhe Arsimin.
“Ekziston një dallim ontologjik – madje përpara atij estetik – midis artit dhe asaj që një makinë mund të gjenerojë përmes llogaritjes statistikore, bazuar në miliona imazhe të krijuara nga të tjerët. Algoritmeve u mungon shkëndija e njerëzores, ndërsa kultura dhe arti autentik e ruajnë këtë shkëndijë”, ka thënë Papa.
Papa iu referua një paraardhësi të tij, Paul VI, i cili në vitin 1964 u kishte thënë artistëve: “Kemi nevojë për ju”. Leo e përsëriti këtë mesazh dhe vazhdoi duke thënë se misioni i Kishës ishte “ta bëjë botën e shpirtit… frymëzuese. Dhe në këtë detyrë, e cila e përkthen botën e padukshme në forma të qasshme dhe të kuptueshme, ju jeni mjeshtrit”.
Papa e shoqëroi fjalimin me një postim në “X,” platformën e mediave sociale në pronësi të Elon Musk, përpjekjet e të cilit në këtë fushë i siguruan një vend në takimin e presidentit më 29 shtator, me një mesazh në të njëjtën frymë: “Ne jetojmë në epokën e motorëve të kërkimit që na ofrojnë mijëra përgjigje të menjëhershme”, u ka thënë Leo artistëve dhe kuratorëve të premten. “Megjithatë, pavarësisht se sa të fuqishëm mund të jenë, ata thjesht na kthejnë atë që tashmë ekziston dhe priren të na japin atë që ne tashmë duam”.
Arti, shtoi ai, “është një lloj tjetër ‘motori kërkimi’”, duke shtuar: “Ai nuk funksionon përmes indeksimit, por përmes kërkimit. Në të vërtetë, kërkimi i tij është një vëmendje e përqendruar që nuk kënaqet me shumën e thjeshtë të fakteve, sepse nuk pushon kurrë së depërtuari më thellë, duke kërkuar fillin që i bashkon ato. Arti juaj, kur i reziston homogjenizimit, kur e tërheq shikimin tonë, kur na detyron të ndalemi përballë asaj që nuk mund të konsumohet, është një formë e rigjenerimit kulturor dhe shpirtëror”.
Papa përfundoi duke thënë: “Të dashur artistë, të dashur kuratorë, dijeni se Kisha ju sheh me respekt, mirënjohje dhe shpresë, se ajo ka nevojë për ju dhe se dëshiron të ecë krah jush, në mënyrë që së bashku të mund të ruajmë madhështinë e njerëzimit që na është besuar. Zoti ju bekoftë të gjithë ju dhe punën tuaj!”.
(marrë nga ArtNews)