Korça e sivjetme edhe më shumë i ka dhënë kuptim cilësimit të saj si qytet i kulturës, serenatave e festivaleve. Përmes frymës gazmore të karnavaleve, qyteti juglindor shqiptar ka hapur zyrtarisht sezonin turistik, i cili gjatë muajve të verës do të begatohet edhe me festivalet e njohura të birrës, kulinarisë dhe artit.
Me pjesëmarrjen e 26 grupeve të ndryshme, Festivali Ndërkombëtar i Karnavaleve, i hapur në fundjavë, në bulevardin e qytetit ka sjellë një parakalim ngjyrash, stilesh e maskash.
Si ngjarje që ka tërhequr edhe turistë nga Evropa e dashamirë karnavalesh, grupet korçare si dhe ato nga qytete të tjera kanë parakaluar duke shoqëruar performancat edhe me një fabul.
Edicioni i sivjetmë – ndryshe nga ai i vjetshmi që ishte cunguar për shkak të pandemisë – për të katërmbëdhjetin vit i ka falur Korçës bukurinë festive të butaforisë e maskave të karnavalit.
Me një video dyminutëshe, edhe kryeministri shqiptar Edi Rama ka zgjedhur ta afirmojë këtë ngjarje.
Edhe
Karnavalet si mëkat dhe tallje me të fuqishmit
“Me festën e rilindur të karnavaleve në Korçën turistike, ju uroj një ditë të mbarë”, ka shkruar Rama të mërkurën në faqen e tij zyrtare në “Facebook”.
Me origjinë nga latinishtja, “Carneval” është emri që përshkon kremtime lokale e rajonale kryesisht në vendet me gjuhë neo-romane. Sipas traditës kristiane, ngjarjet kryesore mbaheshin në fund të shkurtit ose në fillim të marsit, me kremte publike, parada, ahengje në rrugë, dëfrime e ndërthurje të elementeve të cirkut.
Edhe pse me zanafillë pagane, “karnavalet” në Korçë kanë nisur të festohen në Korçë në fund të viteve ‘30, veçmas me krijimin e shoqërive kulturore si “Rinia Korçare”.
Ishte koha kur këto organizime shoqëroheshin me mandolina, kitara e këngë humoristike. Në vitet ‘60, në kohën e sistemit komunist, kjo festë do të ndërpritej për t’u rilindur vetëm pas viteve ‘90.
Edhe
Bregoviqi “ndez” Korçën me muzikë rome, gazi lotsjellës mbetet periferik
Kështu, Korça u bë një nga qytetet e para shqiptare që rizgjoi traditën e ndërprerë të karnavaleve: më 1992, aty u krijua Shoqata e Karnavalit si pjesë e Shoqatës Kombëtare të Karnavalit Shqiptar. Më 10 prill 1994, në Korçë u mbajt edicioni i parë i Festivalit Ndërkombëtar të Karnavalit në Shqipëri. E grupe korçare të karnavalit janë përfaqësuar në një varg festivalesh ndërkombëtare në Evropë.
Përgatiti: Salih Mehmeti
