Italia blen për 30 milionë euro veprën e Caravaggios

Me misionin që kryeveprat e artit botëror të mos mbesin prona koleksionesh, shteti italian ka blerë për 30 milionë euro, “Portretin e Monsinjor Maffeo Barberinit” të Caravaggios. “Kjo është një vepër me rëndësi të jashtëzakonshme”, ka thënë ministri i Kulturës i Italisë Alessandro Giuli në një deklaratë, duke theksuar se piktura ishte një pikë kthese në rizbulimin modern të mjeshtrit të Barokut

Italia ka blerë një portret të rrallë të piktorit të Barokut, Caravaggio, për 30 milionë euro (rreth 35 milionë dollarë). Kjo është një prej blerjeve më të mëdha shtetërore për një vepër të vetme arti, ka njoftuar të martën Ministria e Kulturës e Italisë.

Portreti, i pikturuar rreth vitit 1598 dhe i atribuuar Caravaggios në vitin 1963, paraqet Maffeo Barberinin, një fisnik që më vonë u bë Papa Urbani VIII.

Shteti italian e bleu pikturën nga një koleksion privat pas negociatave që zgjatë më shumë se një vit. Tash kjo vepër do të bëhet pjesë e koleksionit të përhershëm të Palazzo Barberini në Romë.

“Kjo është një vepër me rëndësi të jashtëzakonshme”, ka thënë ministri i Kulturës i Italisë Alessandro Giuli në një deklaratë, duke theksuar se piktura ishte një pikë kthese në rizbulimin modern të Caravaggios dhe se blerja e saj ka ndihmuar në forcimin e pranisë së veprave të tij në koleksionet publike italiane.

Ky përvetësim i ri vjen pas një tjetër blerjeje të fundit të veprës Antonello da Messina “Ecce Homo”, dhe është pjesë e projektit më të gjerë të Italisë për të forcuar trashëgiminë kulturore kombëtare, duke i bërë disa kryevepra të historisë së artit të qasshme për studiuesit dhe publikun.

“Portreti i Monsinjor Maffeo Barberini” paraqet papën e ardhshëm në të tridhjetat e tij, i veshur si klerik i Dhomës Apostolike, në një moment vendimtar të ngritjes së tij drejt pushtetit.

Vepra u bë e famshme nga kritiku i artit Roberto Longhi në artikullin e tij të vitit 1963 “The True ‘Maffeo Barberini’ of Caravaggio”, dhe që atëherë është pranuar gjerësisht nga kritikët si një vepër e Caravaggios, i njohur gjithashtu si Michelangelo Merisi.

Longhi e quajti pikturën “një nga momentet themeluese të portretit modern”, duke theksuar se Caravaggio solli një intensitet të ri psikologjik në art.

Caravaggio revolucionarizoi pikturën në fund të shekullit XVII duke futur një përdorim dramatik të dritës që u bë themeli i stilit barok. Ai është sot një nga artistët më të studiuar në botë, megjithatë numri i veprave të tij të konfirmuara mbetet jashtëzakonisht i kufizuar.

Në “Palazzo Barberini”, portreti do të ekspozohet së bashku me vepra të tjera të Caravaggios — një nga koleksionet më të rëndësishme në botë — veçmas pranë një tjetër kryevepre të tij, “Judith Slaying Holofernes”, e cila gjithashtu u ble nga shteti italian në vitin 1971.