Historia e shpëtimit të hebrenjve në Kosovë shpaloset në Slloveni

“Shtëpia e Tolerancës” në Lubjanë ka bërë bashkë rrëfime për solidaritetin me hebrenjtë e njeriun në përgjithësi, e në këtë mozaik ka qenë edhe rrëfimi me “Kujtimet e një tavoline ngrënieje” që zbërthen se si shqiptarët kishin shpëtuar hebrenjtë gjatë Luftës së Dytë Botërore dhe rolin e besës në traditën shqiptare.

Para një publiku të përzgjedhur dhe në praninë e përfaqësuesve të korit diplomatik të akredituar në Republikën e Sllovenisë, komunitetit artistik dhe përfaqësuesve të institucioneve të tjera, u prezantua performanca “Kujtimet e një tavoline ngrënieje” e organizuar në Qendrën Kulturore Hebraike në Lubjanë, me rastin e hapjes së edicionit të katërt të festivalit “Shtëpia e Tolerancës”, të dielën e 18 marsit, në bashkorganizim me “Mini Teater” Lubjanë, shkruan sot Koha Ditore.

Festivali njëjavor, i cili ka për synim promovimin e tolerancës dhe mesazhin kundër gjuhës së urrejtjes midis njerëzve, zyrtarisht u hap nga drejtori i festivalit, Robert Waltl, i cili duke theksuar rëndësinë e festivalit shpalosi programin e filmave dhe aktiviteteve të tjera. (Detajet mund t’i gjeni në numrin e sotëm të Kohës Ditore)