Ekspozita e Llapashticës hap “Javën e Gjidhënies” në Kosovë

Vetëm 40 për qind e fëmijëve të moshës nën gjashtë muaj, ushqehen me qumësht të gjirit të nënës.

Për ta rritur këtë përqindje edhe më shumë, në hapjen e Javës Botërore të Gjidhënies me temën “Ta mbështesim gjidhënien së bashku”, u tha se ushqyerja e fëmijëve me qumësht gjiri, mbron shëndetin e tyre.

Përfaqësuesja e Ministrisë së Shëndetësisë, Merita Vuthaj, ka thënë se po angazhohen që të jenë një hap më përpara se kompanitë farmaceutike që zëvendësojnë qumështin e gjirit të nënës, duke iu ofruar mbështetje nënave që t’i ushqejnë foshnjat me qumësht gjiri, raporton KTV.

{gallery}

Ndërkaq, kryetari i Prishtinës, Shpend Ahmeti, ka thënë se gjidhënien, si shoqëri, nuk guxojmë ta kthejmë në tabu, pasi, sipas tij, qumështi i gjirit të nënës është i pazëvendësueshëm dhe mbron shëndetin e fëmijëve dhe të nënës nga sëmundje të ndryshme.

Java e Gjidhënies ka nisur me hapjen e një ekspozite, ku janë paraqitur në fotografi shumë nëna nëpër ambiente të ndryshme duke i ushqyer fëmijët e tyre me qumësht gjiri të bëra nga fotografi Arben Llapashtica.