Gjenocidi i luftës së fundit në Kosovë u përmend para yjeve të filmit në sallën “Royal Albert” në Londër, kur regjisori Daniel Mulloy u ngjit në skenë për ta marrë statuetën dalluese të ceremonisë që nderon arritjet filmike britanike e ndërkombëtare.
Regjisori i filmit “Home” - bashkëprodhimit britaniko-kosovar që ia solli Kosovës për herë të parë çmimin “Bafta” - e nisi fjalimin duke ndërlidhur gjendjen aktuale të refugjatëve me refugjatët kosovarë të luftës së viteve 1998-99.
Me fjalët që i tha në skenën e ceremonisë së 70-të të çmimeve që ndan Akademia Britanike e Filmit dhe Arteve Televizive, ai përcolli mesazh universal për refugjatët, shkruan sot “Koha Ditore”. Porosia e tij gjeti përkrahje në mesin e yjeve të filmit – mes së cilëve në një video të publikuar në kanalin “youtube” aktorja hollywoodiane Meryl Streep shihet tek afirmon me kokë mesazhin e britanikut.
“Uou! Kjo është e pabesueshme. Ky film është bërë nga shumë njerëz. Producentja ekzekutive, Arta Dobroshi, Shpend Qamili e Shpat Deda janë të gjithë ish-refugjatë nga gjenocidi në Kosovë”, ka thënë Mulloy, i shoqëruar në skenë edhe nga producentët e tjerë të filmit, përfshirë Alofabi Kutin, Scott O’Donnallin, Chriss Wattlingin, Nora Sahatçiun, Tim Nashin dhe Anthony Austin.
Minutat që iu ndanë në skenë Mulloy i ka shfrytëzuar për të dëshmuar se të gjithë duhet t’ua hapin dyert refugjatëve. Një porosi e tillë përthekohet edhe në filmin nën regji të tij”, që trajton fatin e refugjatëve në një perspektivë universale dhe i bën shikuesit të mendojnë se kushdo mund ta ketë një fat të tillë.
Edhe
“Home” është shembull i bashkimit rreth një kauze
“Home”, koproduksion kosovaro-britanik, çoi mesazh të mirë për kinematografinë e vendit edhe në “Europeran Film Awards”, kur në dhjetor të vitit që shkoi u nominua për filmin më të mirë të shkurtër.
Në një komunikatë të dërguar nga ekipi i “DokuFestit”, të hënën, janë përfshirë reagimet e producentëve kosovarë të filmit. Mes tyre citohet edhe Shpat Deda, i cili qe prezent në ceremoninë e ndarjes së çmimeve “Bafta”.
"Vlerësimi që ‘Home’ e mori në ‘Bafta’ është një nder i hatashëm dhe dëshmi e asaj që mund të arrihet kur njerëzit bëhen bashkë për një kauzë humane, në këtë rast për refugjatët. Mbi të gjitha, suksesi i filmit ‘Home’ i jep frymë të re mesazhit të bashkëndjesisë që ne synojmë ta ndezim tek njerëzit dhe na e mundëson të arrijmë tek një audiencë edhe më e gjerë botërore, gjë që ishte qëllimi ynë që nga fillimi”, citohet të ketë thënë Deda.
Aktorja Arta Dobroshi tashmë e ka dëshmuar që meriton admirim e mbështetje, duke u bërë pjesë e kastës së filmave të njohur si “Heshtja e Lornës” të vëllezërve belg Jean-Pierre e Luc Dardenne. Sharmi i saj nuk u ka shpëtuar syrit të fotoreporterëve të prestigjiozes britanike “The Guardian”, përderisa janë shpërndarë edhe foto të Dobroshit me aktoren e njohur Meryl Streep... (më gjerësisht lexoni sot në “Koha Ditore”)
Edhe
“Home” prezantohet në Prishtinë
Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.
© KOHA. Të gjitha të drejtat janë të rezervuara.
