Përderisa melodia e instrumenteve frymore tingëllon fuqishëm, publiku merret me vete sa nëpër këngët e njohura shqiptare, sa në ato të huajat. Uljet dhe ngritjet e melodive sjellin adrenalinë në një thurje njëorëshe të muzikës popullore, rock, funk e jazz.
Kur 23 anëtarët e orkestrës nuk kursejnë në asnjë moment frymën kushtuar performancës, publiku nuk rezistoi dot deri në fund të koncertit pa u ngritur në këmbë. Madje edhe pa u bërë pjesë e vetë performancës, duke bërë tok melodinë e nxjerrë nga duart me atë që grupi përformues e kishte planifikuar në program. Ky moment ishte ai kur të pranishmit dhe orkestra u bënë një, dhe qëllimi i tyre qe përjetimi i melodive të bukura së bashku, pa pasur role të ndara të paktën në një moment. Ishte pikërisht ai çast kur kush sa mundte kontribuonte që atmosfera të mbërrij kulmin, kush me zë, kush me duartrokitje, kush me instrument.
Përzierja e këtyre stileve të ndryshme muzikore është ajo që iu shtua repertorit të orkestrës frymore “Prizreni”. Si programi i dytë i ri i këtij formacioni themeluar para tre vjetësh, ai u prezantua mbrëmjen e së premtes në “Kino Armatë”, para publikut prishtinas, përderisa do vazhdojë të performohet nga tash e tutje në shumë vende të tjera.
Programi i ndarë në dy pjesë, në atë të këngëve vendore shpalosi orkestrime të këngëve të njohura. E nisën me melodinë e “Kënga e bilbilit”, për të dalë tek “Kur gjethet bien në vjeshtë”, përderisa pika e tretë ishte planifikuar të ishte “Pranverë në Prizren”, në qytetin ku nisi ideja e bashkimit të instrumentistëve frymorë. Pasoi “Lule, lule, mace, mace” në version unik nga kjo orkestër, për të dalë te “Kur perëndon dielli”. Pjesa e parë e koncertit, u mbyll me potpuri shkodrane, që përjetohej fuqishëm nga publiku rreth 280 km larg Shkodrës. “Lule bore” dhe “Si dukat i vogël” qenë ikonat e muzikës shqipe që erdhëm si kulmimi i kapitullit të parë të mbrëmjes.
Pjesa e dytë qe e rezervuar për meloditë e këngëve të huaja. “Arioso”, “Uptown Funk”, “Yo soy Maria” dhe “You Give Love A Bad Name” jehuan në sallë kur atmosfera tashmë ishte ndezur.
Kjo laramani e programit në stil e gjuhë, pos kënaqësisë në publik, solli edhe shumë krenari për pjesëtarët e orkestrës.
Edon Ramadani, dirigjenti i kësaj mbrëmjeje, ka thënë se ishte shumë i kënaqur që e enjtja në Prizren, dhe e premtja në Prishtinë, bëri që publiku të kënaqet me performancën e tyre.
“Përveç që kemi pika klasike duke filluar me Bahun, natyrisht të gjitha këto të përpunuara edhe aranzhuara për një formacion të tillë, kemi edhe pika pak më pop e rock, prapë të stilizuara edhe të adaptuara për një formacion të tillë. Veçoria e këtij koncerti është që orkestra nuk është duke dalë për herë të parë, por programi që ne e luajtëm sot ishte premierë. Ndoshta ndonjë pikë që e luajtëm sot ka qenë në ndonjë orkestër tjetër, por për ne ky program ishte tërësisht një program i ri. Shumë prej pikave janë të orkestruara enkas për këtë formacion dhe për këtë koncert”, ka thënë Ramadani.
E një punë e tillë, ndonjëherë e lodhshme, por në të njëjtën kohë shumë pasionante për ta, do të prezantohet edhe jashtë kufijve. Përpos në qytetin e Shkodrës, orkestra synon që së shpejti të ngjitet edhe në skenën e Turqisë.
“Tash po planifikojmë që të dalim edhe jashtë. Ta prezantojmë orkestrën dhe programin dhe të dalim edhe jashtë kufijve. Jo vetëm të Kosovës dhe të shqiptarëve, por të dalim edhe më tutje nëpër Evropë. Kemi disa plane. Kështu që po besoj se tashmë jemi edhe më të shtrënguar, siç thotë populli. Por edhe në aspektin programor kemi më shumë opsione për një përzgjedhje dhe për një përfaqësim të këngëve tona të bukura në këtë formë”, ka thënë ai.
Orkestra frymore trevjeçare e Kosovës, performancën në skenat jashtë vendit i kishte synim qysh nga themelimi. Ishin problemet financiare që u bënë pengesë për një paraqitje të tillë.
“Natyrisht edhe këto udhëtime kërkojnë një buxhet më të madh, e që ajo është pengesa kryesore pse s’kemi mundur të dalim deri më tani. Por kemi disa premtime edhe nga autoritetet vendore që do të kemi përkrahje, kështu që do të jemi duke pritur. Ne jemi të gatshëm, kështu që jemi duke pritur përkrahje konkrete dhe do të vazhdojmë edhe jashtë vendit”, ka thënë dirigjenti.
Mjetet financiare dhe mungesa e repertorit për një formacion si ky, nuk janë problemet e vetme.
Klarinetisja Malbora Krajku ka thënë se jo rrallë kanë edhe sfida të tjera.
“Më shumë vështirësi hasim ne mbledhjen e 23 anëtarëve, sepse ne jemi nga qytete të ndryshme edhe të gjithë duhet të udhëtojmë që të takohemi në prova. Mundohemi shpesh t’i mbajmë në Prishtinë, por një pjesë të madhe i mbajmë edhe në Prizren. Kjo pjesë ndoshta është pak më e vështirë. Por ne këtë e kemi profesion, e bëjmë më shumë qejf dhe kënaqësi. Kështu që me rëndësi që produkti final me qenë ashtu siç e planifikojmë ne”, ka thënë Krajku, duke treguar se kjo është vetëm diçka e vogël dhe dashuria që ata kanë për punën i tejkalon të gjitha vështirësitë. Përherë janë në përpjekje të arritjes së përcjelljes së këngëve të bukura te publiku.
“Ky program që ne jemi duke e luajtur është shumë i përshtatshëm për publikun. Ka pak funk, pak rock, pak muzikë popullore që janë të aranzhuara ekstra për orkestra frymore. Nuk është një lloj programi që i mërzit ata. Veçse kënaqen duke dëgjuar”, ka thënë Shkumbin Bajraktari, anëtar i Orkestrës.
Mbrëmja në Prishtinë e dëshmoi që programi është i tillë, i dashur për publikun.
“Duhet të ketë sa më shumë organizime të tilla. Nëse jo më tepër, të paktën një herë në muaj të ketë një organizim të tillë. I shton vlerat shumë. Mendoj që ka shumë vlera kjo muzikë e përpunuar nga orkestra. Ishte diçka me të vërtetë shumë, shumë e mirë”, ka thënë Shpresa Rama e cila pasi qe pjesë e publikut për rreth një orë, ka thënë se një event i tillë artistik është një vlerë e shtuar për Kosovën dhe freski për skenën kulturore.
© KOHA. Të gjitha të drejtat janë të rezervuara.
