Kulturë

“Kosova” e fituesit të çmimeve “Emmy” – shembull i propagandës serbe

“Kosova” e fituesit të çmimeve “Emmy” – shembull i propagandës serbe
“Ai ka shkruar këngën ‘Kosova’ nga dashuria për popullin serb dhe Kishën, duke dhënë kontributin e tij personal, artistik dhe shpirtëror për ruajtjen e Kosovës dhe Metohisë”, është përshkrimi që Fondacioni i Hilandarit ia bën këngës “Kosovo: Joy of All Who Sorrow” të artistit hollywoodian, Jonathan Jackson

“Një popull i lindur nga Zoti, një komb i veçuar, një këngë e bukur që ngrihet nga errësira”, janë disa nga vargjet e para me të cilat hapet një këngë në dukje paqësore. Por brenda pak sekondash, lirika kthehet në një pamflet politik. Autori i saj nuk është ndonjë nacionalist serb, por vetë aktori hollywoodian Jonathan Jackson. Të dielën e 28 qershorit, kur serbët festojnë Vidovdanin, Fondacioni i Hilandarit kishte publikuar një videoklipin që e shoqëron këngën e tij më të re. Edhe disa ditë më pas mediat serbe i kanë dhënë bujë këtij realizimi që vjen prej amerikanit të sapokonvertuar në ortodoksizëm.

Videoja në kohëzgjatje prej 5 minutash hapet me një paralajmërim mjaft sugjestiv. “Me bekimin e të shumënderuarit arkimandrit Metodije, peshkop i Lavrës së Shenjtë Imperiale të Hilandarit”, është përshkrimi në fillim të klipit.