Kulturë

Therrë Murrizi – veterani i guximshëm i karikaturës

Therrë Murrizi – veterani i guximshëm i karikaturës
“Karikatura nuk është për të gjithë që e shikojnë. Karikatura shijohet nga ai që është në nivel të karikaturistit ose mbi të. Është medium shumë i fortë me pak vija”, kishte thënë Ramadan Zaplluzha (Foto: Shkëzen Rexha)

Për dekada të tëra Therrë Murrizi ka thumbuar realitetin. Me këtë pseudonim ose emër artistik ka botuar karikatura në gazeta e revista në Kosovë e jashtë saj. Bënte pjesë te satiristët më të pëlqyer në faqet e gazetave. Mësimdhënësi Ramadan Zaplluzha, që për publikun e gjerë do të bëhej i njohur si karikaturist, ka vdekur të hënën. Ai ishte 82 vjeç. Veçohet si thumbues i zoti e i guximshëm. Emri i tij zë vend në listën e shkurtër të veteranëve të karikaturës në Kosovë.

Zaplluzha, që deri në fund të viteve ‘50 e kishte mbiemrin Bytyqi, u lind më 28 prill 1938 në Prizren, ku do të përfundonte edhe shkollën fillore. Që nga viti 1953 deri më 1954 do të përfundonte Shkollën Normale në Prishtinë, për t’u bërë mësues në disa vendbanime të rajonit ku jetonte. Numëron mbi gjashtë dekada krijimtari në vizatim, karikaturë dhe strip. Qysh si i ri kishte nisur të shfaqte dozë të talentit. Këtë do ta përvetësonte më vonë duke u bërë pjesë e plejadës së parë të karikaturistëve në vend.