Kulturë

Shqiptarët në Londër e shënuan me koncert 12-vjetorin e Pavarësisë së Kosovës

Ambasada e Republikës së Kosovës në Londër ka organizuar një koncert festiv për nder të 12-vjetorit të pavarësisë së Kosovës.

Nën tingujt e muzikës së zgjedhur, artistët kujtuan dhe nderuan divën e muzikës shqipe, znj. Nexhmije Pagarusha, e cila u nda nga jeta javën e kaluar, shkruan albinfo.ch.

Në koncertin e mbajtur në Londër, e ngarkuara me punë në Ambasadën e Republikës së Kosovës në Londër, Arrita Gjakova përshëndeti dhe falënderoi të pranishmit për pjesëmarrje.

Në këtë event ishin të pranishëm personalitete të shquara nga institucionet vendore politike e kulturore në Britani, si edhe përfaqësues të korit diplomatik të akredituar në Mbretërinë e Bashkuar.

Interpretues e instrumentistë nga profesorë të Fakultetit të Arteve të Universitetit “Haxhi Zeka” në Pejë u bënë bashkë në koncertin e mbështetur nga Ambasada e Republikës së Kosovës në Londër, ku përgjatë dy orëve publiku në “Holy Trintity Church” në Londër pati mundësinë të dëgjojë interpretime veprash kompozitorësh të huaj dhe shqiptarë.

Pjesë e interpretuesve dhe instrumentistëve ishin: Mezosopranoja Besa Berberi, në klarinet Fatbardh Gashi, në piano Mimoza P. Drançolli dhe flaute – Dardane Nallabani-Batalli. Gjithashtu kishte edhe interpretuess të ftuar që jetojnë në Londër, z. Yaron Shavit, piano Ilya Ushakov, violinë dhe Idlir Shyti në çello. Programi ishte shkëputje veprash nga kompozitorë të njohur botërorë, si Bach, G.F. Handel e R. Schumann, shkëputje nga krijimtaria e kompozitorëve shqiptarë, si Th. Simaku, R. Dhomi, T. Harapi, K. Gashi e H. Nimani. /Albinfo.ch.

{gallery}