Katër ditë pasi dyshohet se kishte therur me thikë një 35-vjeçar në rrugën “Kemajl Hetemi” në Ferizaj, Policia e Kosovës ka arrestuar të dyshuarin që thuhet se kishte ikur nga vendi i ngjarjes.
Vepra fillimisht ishte cilësuar si “lëndim i rëndë trupor”, ndërsa më vonë është ricilësuar si “vrasje e mbetur në tentativë”.
Rasti i therjes ndodhi më 4 qershor në mesditë. I dyshuari kishte ikur nga vendi i ngjarjes. Sh.S. kishte marrë lëndime të rënda trupore.
Policia ka thënë se ka nisur hetime intensive dhe të mërkurën në mbrëmje ka arrestuar Y.R. 31-vjeçar. Si provë materiale është sekuestruar thika me të cilën dyshohet se është kryer vepra.
I dyshuari është ndaluar për 48 orë, me vendim të prokurorit të rastit.
