Dogana e Kosovës ka njoftuar të shtunën se ka parandaluar dy raste kontrabande në pikën kufitare Jarinjë, gjatë kontrolleve të zhvilluara në hyrje të territorit të Kosovës.
Në rastin e parë, zyrtarët doganorë, gjatë një kontrolli të detajuar mbi një automjet të udhëtarëve të drejtuar nga një shtetas i Serbisë, zbuluan dhe sekuestruan rreth 300 gramë argjend të padeklaruar, i cili ishte fshehur me qëllim të shmangies së detyrimeve doganore dhe futjes ilegale në tregun e Kosovës.
Ndërsa në rastin e dytë, gjatë kontrollit të një automjeti tjetër, u gjet sasi e konsiderueshme produktesh të qumështit që po tentohej të kontrabandoheshin pa dokumentacionin e nevojshëm shoqërues dhe në kundërshtim me rregullat e importit të produkteve me prejardhje shtazore.
Mallrat e sekuestruara janë dërguar për procedura të mëtejme ligjore, ndërsa Dogana ka bërë të ditur se mbetet e përkushtuar në luftën kundër kontrabandës dhe në mbrojtjen e ekonomisë dhe shëndetit të qytetarëve.