Në Prokurorinë Speciale është paraqitur për intervistim një i dyshuar lidhur me rastin kur tre persona u arrestuan pasi u kapën duke transportuar 1 milion euro në pikëkalimin në Merdar më 24 shkurt të këtij viti.
Policia njoftoi se i dyshuari, shtetas i Gjermanisë, ka pranuar se paratë ishin të tij por ai nuk ka arritur ta dëshmojë prejardhjen e tyre. Ai është arrestuar dhe është dërguar në mbajtje.
“Më 23.10.2026 në PSRK është paraqitur për intervistim i dyshuari mashkull shtetas i Gjermanisë, për shkak se me 24.02.2026 në vendkalimin kufitar në Merdare në automjetin me targa të Shqipërisë në një hapësirë të modifikuar brenda në automjet, janë gjetur dhe sekuestruar 1.000.000 (një milion) euro. I dyshuari gjatë intervistimit ka pranuar se paratë e konfiskuara kanë qenë të tij, por nuk ka arritur të dëshmojë prejardhjen e parave dhe lidhjen me personat e dyshuar që kanë bërë transportin e tyre”, njoftoi PK në raportin 24-orësh.
Tre të dyshuarit u kapën në shkurt duke transportuar 1 milion eurot e padeklaruara të fshehura në një hapësirë të modifikuar në dyshemenë e një minibusi. E.A. po drejtonte mjetin. Njëri prej të dyshuarve, A.K., ishte polic në Tiranë që u suspendua pas arrestimit.
Në brendi të minibusit janë gjetur 18 pako me para, të përbëra nga bankënota të ndryshme prej 10, 20, 50, 100 deri në 200 euro, secila me nga një numër të shënuar në qesen me të cilën janë mbështjellë.
Minibusi, i cili po qarkullonte nga Serbia në drejtim të Kosovës, ka qenë pa udhëtarë, gjë kjo që për zyrtarë të Doganës ka përbërë indikacion për kontroll të detajuar.
Mbi të pandehurit rëndon vepra penale “shpëlarja e parave”.