Aktakuzë ndaj 3 personave, dyshohen se mashtruan duke u premtuar viktimave kontrata pune në Afganistan, Irak e Poloni

Prokuroria Themelore në Ferizaj ka ngritur aktakuzë ndaj tre personave për veprat penale “mashtrim” dhe “ndihmë në kryerje të veprës penale të ‘mashtrimit’”. 

N.L. akuzohet se gjatë periudhës kohore 2020-2022, duke u premtuar viktimave se do t’u sigurojë kontrata pune në bazat ushtarake amerikane në Irak, Afganistan e Poloni, u mori 3000 deri 6000 euro. Ai u kërkonte këto para “për sigurimin e kontratave” dhe këto para i merrte kesh apo nëpërmjet transfereve bankare. 

Ai në total kishte mashtruar viktimat në vlerë deri 80 mijë euro. Akuza të njëjta rëndojnë edhe ndaj të dyshuarit K.H. 

Ndërsa i dyshuari K.L. akuzohet se me dashje e ka ndihmuar bashkëshortin e saj N.L. në kryerje të veprës penale të mashtrimit, ku në momentin kur bashkëshorti i saj nuk gjendej në Kosovë ajo pranonte të hollat nga viktimat dhe i depononte ato në bankë apo ia dërgonte bashkëshortit nëpërmjet Western Union. 

“Prokurori i çështjes, me rastin e ngritjes së aktakuzës, i ka propozuar Gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, të pandehurit e lartëcekur të shpallen fajtor për veprat penale për të cilat akuzohen dhe të dënohen sipas ligjit”, thuhet nga Prokuroria Themelore e Ferizajt.