Aksion i madh kundër drogës në Shqipëri, asgjësohen mbi 24 mijë bimë kanabisi

Një operacion i gjerë kundër kultivimit të kanabisit është zhvilluar në Shqipëri nga policia në 72 orët e fundit në malësinë e Krujës, qarkun Shkodër, në qarkun Lezhë dhe në

Tropojë, ka njoftuar Policia e Shqipërisë.

Si rezultat i këtij operacioni, ku u përfshin 7000 punonjës policie dhe 90 dronë, janë asgjësuar në total 24 220 bimë kanabis.

“Gjatë kontrolleve, në territorin e fshatit Arst në Pukë, u gjetën 29 kilogramë kanabis në formën e boçeve. U shpall në kërkim autori i dyshuar i këtij rasti, shtetasi N. H., si dhe nisi procedimi në gjendje të lirë, për kryetarin e fshatit Arst, shtetasin K. B., për shpërdorim detyre”, thuhet nga Policia.

Në qarkun Shkodër u asgjësuan në total 15 338 bimë narkotike që u gjetën të kultivuara në fshatra të ndryshme të bashkive Shkodër, Malësi e Madhe, Vau i Dejës dhe Fushë Arrëz.

“Si autor i dyshuar i njërit prej rasteve të kultivimit, u shpall në kërkim shtetasi P. D., 52 vjeç, banues në Arst, Fierzë, Fushë Arrëz. Ndërkohë vijon puna për identifikimin dhe kapjen e shtetasve të përfshirë në rastet e tjera të kësaj veprimtarie kriminale”, thuhet nga Policia.

Në malësinë e Krujës u asgjësuan 4630 bimë narkotike kanabis që u gjetën të kultivuara në zona të ndryshme, ndërsa në Lezhë u asgjësuan në total 4000 bimë narkotike kanabis që u gjetën të kultivuara në disa fshatra të ndryshme të rretheve Lezhë dhe Kurbin.

Edhe Kronikë 9 qer 2024 Asgjësohen afro 25 mijë bimë kanabisi në Velipojë

Në zona malore të rrethit të Tropojës u asgjësuan 252 bimë narkotike që u gjetën të kultivuara në fshatra të ndryshme të bashkisë Tropojë.

Policia e Shtetit thekson se do të intensifikojë kontrollet në të gjithë vendin, ndërsa operacioni i koduar “FOKUSI” po vijon pandërprerë në të gjithë vendin, me shërbime nga toka, monitorim nga ajri me dronë, si dhe përmes bashkëpunimit të ngushtë me GDF-në.