Mediat shqiptare në Luginë të Preshevës kanë raportuar për plagosjen e një të riu shqiptar në malin mes Kosovës dhe Serbisë.
Këshilltari Komunal i Medvegjës, Florim Sahiti, ka thënë se Policia serbe ka plagosur rëndë Milazim Muratin nga Gërbaci i Komunës së Medvegjës.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoNdërkaq Sahiti, në një deklarim për LuginaLajm, ka theksuar se 34 vjeçari Murati është plagosur rëndë në malin që ndan Kosovën dhe Serbinë, ku Milazimi ishte i punësuar si roje mali, derisa nuk precizon nëse ka qenë i punësuar nga institucionet e Kosovës apo ato të Serbisë.
“Para dy-tre orëve është plagosur rëndë Milazim Murati nga Gërbaci i Medvegjës. Sipas informatave që i kemi, ai është duke u transportuar nga spitali i Gjilanit drejt QKUK-së në Prishtinë, pasi që ka marrë plagë tejet të rënda”, ka theksuar Florim Sahiti, këshilltar nga radhët e Partisë për Veprim Demokratik në Medvegjë.
Ai gjithashtu ka sqaruar se plagosja e Milazim Muratit është bërë nga policia lokale dhe jo nga ajo e njësitit të xhandarmerisë.
Për këtë rast ka reaguar edhe Ragmi Mustafa, kryetar i Këshillit Nacional Shqiptar (KNSH).
“Një lajm sa i hidhur po aq i tmerrshëm. Plagoset i riu Milazim Murati nga Gërbaci i Medvegjës, nga autoritet policore. Le të lutemi që të shpëtojë nga fataliteti”, shkroi Mustafa në Facebook.
Lajmin për plagosjen e të riut e ka konfirmuar për Koha.net edhe Ejup Govori, mjeku kujdestar në QKUK.
“Gjendja e tij është stabile dhe është i vetëdijshëm, ndonëse ka pësuar dy plagë nga arma e zjarrit. Ka pësuar dy plagë në anën e djathtë të trupit, një në abdomen dhe një në krah”, ka thënë Govori.
Ai ka shtuar se pacienti u ka thënë se është nga Medvegja dhe jeton në Kamenicë.
Ismet Hashani, zëdhënës i Policisë së Kosovës, për rajonin e Gjilanit, ka konfirmuar rastin e plagosjes në zonën kufitare Kosovë – Serbi.
Ai ka thënë për Koha.net se informatën për një të plagosur në zonën kufitare me Serbinë e kanë marrë pasditen e së martës. Sipas tij, rasti ka ndodhur në fshatin Shahiq të Kamenicës.
“Personi i lënduar është sjellë në emergjencën në Gjilan, e për trajtim të mëtejmë është dërguar në Qendrën Klinike Universitare në Prishtinë”, ka thënë ai.