Nga një muaj paraburgim për dy të dyshuarit për grabitjen në Shtime

Nga një muaj paraburgim është caktuar për dy të dyshuarit për grabitjen e 7 gushtit në Shtime, ku mbeti një i vrarë e një i plagosur, bëhet e ditur përmes një komunikate për media.

Gjykata Themelore në Ferizaj - Departamenti për Krime të Rënda thotë se ka aprovuar kërkesën e Prokurorisë Themelore të Ferizajt, për caktimin e masës së paraburgimit ndaj të pandehurit A.T. dhe A.M., për shkak të dyshimit të bazuar se kanë kryer veprën penale grabitje.

Të pandehurit dyshohen se më 7 gusht 2019, në Shtime, duke vepruar si anëtar të grupit së bashku me A.T.1. (i cili gjendet në arrati), me qëllim të përvetësimit të pasurisë së luajtshme të personit tjetër, e që vetes t’i sjellin përfitim pasuror të kundërligjshëm kanë kryer grabitje në dëm të të dëmtuarit N.N., në atë mënyrë që fillimisht të pandehurit janë takuar në Prishtinë dhe me veturë kanë shkuar në drejtim të Shtimes dhe rrugës së transitit janë futur në fshatin Petroviç, ku aty kanë ndalur veturën dhe nga e njëjta kanë dal tani i ndjeri F.G. dhe A.T., ndërsa A.T.1. dhe A.M, kanë mbetur në veturë, ashtu që të njëjtit të armatosur janë futur në shtëpinë e të dëmtuarit.

Të dyshuarit nga aty kanë marr shumën e të hollave prej 24.000 franga, ku në atë moment janë hetuar nga ana e familjarëve dhe gjatë përleshjes në terrasën e shtëpisë, i dëmtuari N.N. mbetet i plagosur me armë zjarri dhe në atë gjendje së bashku me të dëmtuarin tjetër A.N., i ndjekin nga pas dhe pas diku 200-300 metra e kapin të pandehurin F.G ku edhe aty përleshën me ç’rast në vendin e ngjarjes mbetet i vdekur F.G., ndërsa të pandehurit e tjerë me të dëgjuar krismat e armës, largohen me shpejtësi nga vendi i ngjarjes, transmeton Koha.net.

Gjyqtari i procedurës paraprake i Departamentit për Krime të rënda, Ibrahim Idrizi, kërkesën e prokurorit të shtetit për caktimin e masës së paraburgimit kundër të dyshuarve e ka aprovuar si të bazuar konform dispozitës së nenit 187 të KPPRK-së dhe të njëjtëve u është caktuar masa e paraburgimit në kohëzgjatje prej një (1) muaj.

Me këtë rast palët njoftohen se ankesa kundër këtij aktvendimi nuk e shtynë ekzekutimin e tij.

Edhe dy persona tjerë janë arrestuar të shtunën për rastin e grabitjes në Shtime, ku mbeti një person i vrarë e një tjetër i plagosur.

Këtë e ka konfirmuar për Koha.net, majori i Stacionit Rajonal të  Policisë në Ferizaj, Mehmetali Hajdini.

Ai ka bërë të ditur se të dyshuarit janë arrestuar në Prishtinë.

“Deri me tani, lidhur me rastin janë arrestuar tre persona, A.T. 34 vjeçar, A.T. 44 vjeçar, A.M. 44 vjeçar”, ka thënë ai.

Kujtojmë se dje është arrestuar i dyshuari i parë lidhur me rastin e grabitjes në Shtime.

© KOHA. Të gjitha të drejtat janë të rezervuara.