Një përleshje me thika mes disa të rinjve ka ndodhur mbrëmjen e së hënës në Lipjan.
Koha Ditore raporton se sipas dëshmitarëve të rastit, një vajzë me inicialet E.A. nga fshati Resinovc i Lipjanit është therur me thikë pranë Shtëpisë së Kulturës në Lipjan.
Ndërkaq në këtë përleshje, edhe një djalë i një shkolle të mesme ka marrë lëndime, po ashtu me thikë.
Policia e Kosovës ka konfirmuar rastin. Flora Ahmeti, zëdhënëse e Policisë për rajonin e Prishtinës, ka thënë se E.A. femër 16-vjeçare dhe A.R. mashkull 16-vjeç janë të plagosurit.
I dyshuari i cili ka kryer veprën është arratisur. Policia po merret me rastin në vendin e ngjarjes në oborrin e shtëpisë së kulturës në Lipjan./Agim Ademi
