Administrata Tatimore e Kosovës ka vendosur detyrime tatimore ndaj këngëtarit Sinan Vllasaliu, duke u bazuar në informatat që ka marrë prej postimeve të klubeve muzikore nëpër rrjete sociale ku ka pasur të performojë këngëtari, ka thënë inspektori tatimor Fidan Tolaj në gjykimin ndaj Vllasaliut të enjten.
Këngëtari i famshëm ngarkohet se e ka dëmtuar shtetin me 24 mijë e 270 euro, duke iu shmangur tatimeve, raporton “Betimi për Drejtësi”.
Tolaj ka deklaruar se këto klube brenda Kosovës janë inspektuar edhe nga Policia e Kosovës ndërsa për ato jashtë vendit nuk kanë pasur informata përpos posterëve që i kanë postuar në rrjete sociale. Gjatë kësaj seance, inspektori i ATK-së dëshmoi lidhur me hetimet dhe inspektimet që ATK-ja kishte bërë rreth këngëtarit Sinan Vllasaliu për detyrimet tatimore të tij, duke shtuar se çdo e hyrë duhet deklaruar në ATK edhe nëse tatimet janë kryer jashtë vendit. Tolaj, mes tjerash, ka theksuar faktin se i akuzuari Vllasaliu nuk ka sjellë dëshmi për të hyrat e deklaruara në Amerikë edhe pse kishte thënë se do ta bëjë. Duke u përgjigjur në pyetjen e prokurores Elza Bajrami, dëshmitari Tolaj ka thënë se kallëzimi penal që është ushtruar nga ATK-ja është dorëzuar ne Prokurori me provat e bashkangjitur. Mirëpo, në rastin konkret, raport përfundimtar nuk është përpiluar nga ATK-ja, pasi sipas Tolajt, gjatë fazës së hetimeve ishin njoftuar nga prokurori i rastit se është arritur marrëveshja për pranim të fajësisë me Vllasaliun.
Avokati mbrojtës i Vllasaliut, Florent Latifaj kundërshtoi deklarimet e inspektorit pasi tha se ATK nuk ka hartuar raportin final siç është dashur. Latifaj ka thënë se Tolaj nuk ka dhënë përgjigje të saktë kur është pyetur se përse nuk është hartuar ky raport final. Sipas avokatit nuk lejohet që të nxirret mesatarja duke u bazuar në posterët e klubeve.
Tolaj ka thënë se mesatarja është nxjerrë duke u bazuar në deklarimet e Vllasaliut se merr rreth 2000 deri 2500 euro për netët që këndon.
“Prej krejt informacioneve që i kemi marrë ne kemi marrë një mesatare dhe jemi bazuar edhe në deklaratën e tij që e kemi intervistuar. I njëjti ka deklaruar se diku rreth 2000-2500 euro, këtë mesatare e kemi marrë, pastaj ato publikime që janë bërë, i kemi llogarit që janë marrë 2000 euro në nate”, ka deklaruar Tolaj.
Mes tjerash inspektori Tolaj ka thënë se Vllasaiu është paraqitur si tatimpagues i rregullt për vitet 2011-2013 kurse për vitet pasuese 2014-2016 mungojnë këto deklarime.
“Në 2016 nuk mundet me qenë deklarim i rregullt. Kjo tregon se tatimpaguesi nuk ka deklaruar fare për 3 vjet”, ka thënë Tolaj.
Pas këtyre deklarimeve, gjykata ka aprovuar propozimin e mbrojtjes për caktimin e ekspertizës financiare lidhur me rastin, propozim të cilin e ka mbështetur edhe prokurorja dhe përfaqësuesi i autorizuar i ATK-së.
Në rrethana të tilla seanca e sotme ka përfunduar dhe e radhës do caktohet pas marrjes së ekspertizës.
Sipas aktakuzës së ngritur më 2 maj 2018, nga Prokuroria Themelore në Prishtinë, Sinan Vllasaliu po ngarkohet me veprën penale “shmangia nga tatimi”.
Aktakuza ka thënë se i pandehuri Vllasaliu “në cilësi të këngëtarit dhe të pronarit të një biznesi me seli në Prishtinë në vazhdimësi për vitet fiskale 2011, 2012, 2013, 2014 dhe 2015 që ndërlidhen me pagesën e tatimit, tarifave apo kontributeve tjera pranë Administratës Tatimore të Kosovës me qëllim të përfitimit të paligjshëm, nuk ka deklaruar apo ka deklaruar pjesërisht qarkullimin real nga aktiviteti i tij ekonomik”.
Për këtë veprim, ai ngarkohet se ka dëmtuar buxhetin e Republikës së Kosovës në shumë të përgjithshme në vlerë prej 24 mijë e 270 euro e 98 centë.
Me këtë, ai akuzohet se ka kryer veprën penale “Shmangia nga tatimi” nga neni 313, paragrafi 2 lidhur me paragrafin 1 të Kodit Penal të Republikës së Kosovës, vepër kjo e dënueshme me gjobë dhe me burgim prej gjashtë (6) muaj deri në pesë (5) vjet. /BetimipërDrejtësi
