Policia e Kosovës ka njoftuar se ka arrestuar edhe një serb, i cili dyshohet për krime lufte gjatë viteve 1998/99 në Istog.
I dyshuari, për të cilin KOHA ka mësuar se është Zharko Zariq, u arrestua mesditën e së shtunës në fshatin Lubozhdë të Istogut. Dyshohet për veprën penale “Krime lufte kundër popullatës civile”.
“I dyshuari gjatë kohës së luftës në Kosovë në vitin 1998-1999 ka pasur pozitën e komandantit të Nën Stacionit Policor në fshatin Rakosh të Komunës Istogut. I njëjti është sjell në zyrat e DHKL-së ku pritet të intervistohet në cilësi të dyshuarit në prezencë të avokatit mbrojtës”, thuhet në njoftim.
Të premten, Policia arrestoi në Merdar ish-kryeshef e milicisë në Istog, Momir Pantiq.