Inspektorati Policor i Kosovës (IPK) ka njoftuar se hetuesit e këtij institucioni kanë arrestuar një pjesëtarë të Policisë së Kosovës, që dyshohet se është përfshirë në një rrahje.
Rasti thuhet se ka ndodhur të martën në rrugën “Yllka Domi” në Gjakovë.
“IPK është njoftuar për këtë rast bazuar në autorizimet ligjore të saj pasi që informacionet ishin se ne këtë rast ishte i përfshirë si i dyshuar edhe një pjesëtar i policisë (zyrtar i stafit civil pa autorizime policore). Hetuesit e IPK-së kanë dalë në vendin e ngjarjes dhe kanë ndërmarrë disa veprime fillestare hetimore duke përfshirë edhe analizimin e disa video pamjeve të incizuara nga kamerat e sigurisë”, thuhet në njoftimin e IPK-së.
Pas ndërmarrjes së disa veprimeve hetimore në koordinim me prokurorinë thuhet se hetuesit e IPK-së kanë arrestuar zyrtarin e stafit civil, me dyshimin se ai ka kryer veprën penale “lëndim i lehtë trupor”, “pengim i personit zyrtar në kryerjen e detyrës zyrtare” dhe “sulm ndaj personit zyrtar”.
Me vendim të prokurorit thuhet se atij i është caktuar masa e ndalimit për 48 orë kurse si pjesë e procedurës administrative është suspenduar.
“Veprime të tjera do të ndërmerren në përputhje me autorizimet ligjore të IPK-së dhe në koordinim me prokurorinë kompetente”, thuhet në njoftim.
© KOHA. Të gjitha të drejtat janë të rezervuara.
