1 perditesime
17:46

Nga një muaj paraburgim dy të dyshuarve për dhunimet në Gjakovë

Nga një muaj paraburgim iu ka caktuar Gjykata Themelore e Gjakovës dy të dyshuarve për dhunim.

Të dyja rastet kanë ndodhur të martën, 4 tetor dhe sipas gjykatës, rastet nuk lidhen me njëra-tjetrën.

Në rastin e parë, i pandehuri E. N., rreth orës 1:30 në Gjakovë, me përdorim të forcës e kishte detyruar një të mitur të kryejë akt seksual pa pëlqimin e saj. Në komunikatën e gjykatës thuhet se, natën kritike pasi që kontaktoi me të dëmtuarën, u takuan dhe në automjetin e tij pa pëlqimin e saj kryen marrëdhënie seksuale, derisa e dëmtuara arriti që të largohej nga automjeti dhe e paraqiti rastin në polici.

Në rastin e dytë, i pandehuri M. H., rreth orës 15:30 në një motel në Gjakovë, ka kryer akt seksual me një të mitur pa pëlqimin e saj.

Gjykata njoftoi se ai kontaktoi dhe u takua me të dëmtuarën, “shkojnë në motel, ku qëndrojnë së bashku dhe kryejnë marrëdhënie seksuale me të dëmtuarën e mitur, ku më pas paraqitet rasti në polici”.

Me këto veprime të pandehurit dyshohet se kanë kryer veprën penale ”Dhunimi”.

15:50

Kërkohet paraburgim ndaj të dyshuarve për dhunimin e dy të miturave në Gjakovë

Prokuroria Themelore në Gjakovë ka kërkuar paraburgim ndaj dy të dyshuarve për dhunimin e dy vajzave të mitura në Gjakovë të martën.

Sipas Prokurorisë më 4 tetor i dyshuar E.N. me dhunë e ka futur vajzën e mitur dhe ka kryer akt seksual pa pëlqimin e saj.

“I pandehuri me automjetin e tij e merr të dëmtuarën dhe e dërgon tek një parking, fillon ta prek dhe ta puthë, e më pas e godet me shuplakë dhe me përdorim të forcës e pa pëlqimin e saj kryen marrëdhënie seksuale me të dëmtuarën, derisa e njëjta arrin që të dalë nga automjeti dhe të paraqet rastin në polici. Prokurori i rastit ndaj të pandehurit ka kërkuar masën e paraburgimit në afat prej 30 ditësh, dhe i njëjti, me urdhër të prokurorit gjendet në ndalim nga data 04 tetor 2022”, thuhet në njoftim të Prokurorisë.

Në rastin tjetër i dyshuari M.H. raportohet se ka kryer akt seksual me një të mitur pa dëshirën e saj. Ishte dërguar viktima në motel.

“I pandehuri kishte krijuar lidhje dashurie me të dëmtuarën dhe pasi që kontaktojnë dhe takohen,

shkojnë në një motel, ku i pandehuri kryen marrëdhënie seksuale me të dëmtuarën e mitur, dhe më pas paraqitet rasti në polici”, thuhet nga Prokuroria, e cila ka kërkuar një muaj paraburgim.