Tre zyrtarë policorë janë suspenduar të hënën me rekomandim të Inspektoratit Policor, nën dyshimin se kanë kryer veprën penale “Keqpërdorim i pozitës apo autoritetit zyrtar”.
Të suspenduarit janë një kapiten, një rreshter dhe një zyrtar policor, të gjithë punonjës në Njësinë Rajonale të trafikut rrugor në Ferizaj.
“IPK përmes rrugëve operative kishte pranuar një informatë se më 15.04.2022, zyrtarët policorë të e kanë ndaluar një qytetar për vozitje të shpejtë (104 km/h në zonën ku kufizimi i shpejtësisë ishte 50 km/h) dhe ia kanë shqiptuar tiketën në vlerë 500 euro, një vit ndalesë të drejtimit të mjetit motorik dhe pesë pikë negative. Katër ditë pas shqiptimit të tiketës është anuluar tiketa e parë, i është kthyer patentë shoferi qytetarit dhe i është shqiptuar tiketë e re vëllait të qytetarit për vozitje pa patentë shofer duke e anashkaluar plotësisht Komisionin për Vendosje si autoritet i vetëm për anulimin ose jo të tiketave në trafikun rrugor, sidomos kur ka masë mbrojtëse”, thuhet në komunikatën e policisë.
Sipas njoftimit, me këtë rast, dyshimet e hetuesve të IPK-së janë se nga zyrtarët policorë tashmë të suspenduar, është manipuluar tiketa dhe rasti.
© KOHA. Të gjitha të drejtat janë të rezervuara.
