1 perditesime
21:01

Vritet në Gjilan një 50-vjeçar nga Bujanovci

Një person i moshës 50-vjeçare nga Bujanovci është vrarë mbrëmjen e së dielës në Gjilan.

Lajmin për KOHËN e ka konfirmuar zëdhënësi i Policisë së Kosovës për rajonin e Gjilanit, Ismet Hashani, i cili ka bërë të ditur se ngjarja ka ndodhur te parku i qytetit në një kafiteri.

Sipas tij, viktima ishte duke pirë kafe kur dy persona kanë shtënë me armë zjarri në drejtim të tij dhe kanë ikur.

“Ju njoftojmë se rreth orës 19:45 të datës sotme ka pasur të shtëna me armë zjarri në Gjilan – te parku qytetit në një kafiteri. Personi mashkull i moshës 50-vjeçare dyshohet se është nga Bujanovci, ka qenë duke pirë kafe në kafiteri dhe aty kanë ardhur dy persona, kanë shtënë me armë zjarri dhe kanë ikur në këmbë në drejtim të stacionit të autobusave. Të gjitha njësitë janë angazhuar dhe vendi i ngjarjes është siguruar. Viktima e cekur është pa shenja jete”, ka thënë Hashani.

20:42

Gjuajtje me armë në Gjilan, dyshohet për të vdekur

Një person dyshohet të ketë mbetur i vdekur pas disa të shtënave me armë në Gjilan.

Siç ka mësuar KOHA, rasti ka ndodhur para pak minutash.

KOHA është duke pritur përgjigje nga Policia për të mësuar më shumë detaje rreth rastit.