2 perditesime
14:32

Lirohet Faik Fazliu

Ushtruesi i detyrës së kryetarit të Organizatës së Veteranëve të Luftës së UÇK-së, Faton Klinaku, ka njoftuar se Faik Fazliu është liruar nga ndalja prej 48 orëve.

‘’Ju informoj se sapo u lirua ish-kreu i OVL UÇK-së, Faik Fazliu. Gjykata tani i ka edhe faktet me video, të ushtrimit të dhunës ndaj tij gjatë arrestimit’’, thuhet në shkrimin e tij në Facebook.

13:15

Klinaku kërkon lirimin e Fazliut, akuzon Policinë për përdorim dhune

Ushtruesi i detyrës së kryetarit të Organizatës së Veteranëve të Luftës së UÇK-së, Faton Klinaku, ka kërkuar lirimin e menjëhershëm e ish-anëtarit të tyre, Faik Fazliut.

Klinaku përmes një statusi në Facebook madje ka akuzuar Policinë për dhunën e ushtruar.

“Së pari, sqarim për mediat që raportuan se i arrestuari Faik Fazliu është anëtar i kryesisë së OVL UÇK-së, sepse ai ka qenë vite më parë në kryesi dhe ish kryetar por nuk është tani, dhe së dyti në videon që më erdhi, nuk shihet kanosje ndaj zyrtarit policor, por shihet dhunë e ushtruar ndaj një invalidi me shkallë të rëndë nga ana e zyrtarit policor. Kërkoj lirimin e menjëhershëm të tij dhe rasti të shkoj në procedurë të rregullt, si dhe duhet që të hetohet edhe dhuna e ushtruar nga ana e policisë apo e zyrtarëve policor”, ka shkruar Klinaku.

Më poshtë video e momentit të arrestimit të Faik Fazliut, postuar nga Faton Klinaku në profilin e tij zyrtar në Facebook. 

12:24

Arrestohet Faik Fazliu, kërcënoi Policinë

Anëtari i Kryesisë së OVL e UÇK-së, Faik Fazliu, është arrestuar mbrëmë rreth orës 22:40 në rrugën “Tranziti i Ri” në Prizren.

Këtë lajm e ka konfirmuar zëdhënësi i Policisë së Kosovës për rajonin e Prizrenit, Shaban Osmanollaj.

Ai ka thënë se i dyshuari ka kërcënuar verbalisht zyrtarët policorë, derisa këta të fundit po asistonin në kontrollimin e një lokali së bashku me inspektoret e AUV-it, lidhur me mosrespektimin e masave anti-COVID.

“I dyshuari F. F lindur në vitin 1977, ka kanosur verbalisht personin zyrtar gjatë kryerjes së detyrës zyrtare. Zyrtarët policorë po asistonin në kontrollimin e një lokali (kafiteri) se bashku me inspektoret e AUV-it, lidhur me mosrespektimin e masave anti-COVID. I dyshuari është shoqëruar në stacionin policor në Prizren. I dyshuari është intervistuar nga hetuesi kujdestar dhe me aktvendim të Prokurorit iniciohet rasti për "Kanosje ndaj personit zyrtar" dhe i dyshuari ndalet në qendrën e mbajtjes për 48 orë. Rasti është nen hetime’’, ka thënë Osmanollaj në një përgjigje me shkrim. /KP