2 perditesime
10:27

Dy të vdekur nga zjarri në Berat

Është konfirmuar vdekja e dy personave nga zjarri në disa shtëpi në Berat. Babai dhe biri kanë vdekur derisa dyshohen për një të tretë.

Oranews shkruan se zjarri kishte filluar në njërën prej shtëpive të Xhovan Vangjelit, ku më pas janë përfshirë dy shtëpi të tjera.

“Gjatë natës në banesën e shtetasit J.V., ka rënë zjarr, për pasojë zjarri është përhapur dhe në dy banesa të tjera ngjitur, të shtetasve R.S dhe P.N si dhe në katin e tretë të pallatit përballë në banesën e shtetasit M.H.”, njofton Policia.

Pas ndërhyrjes së shërbimeve zjarrfikës zjarri është vënë nën kontroll.

Grupi hetimor është në vendngjarje ku po bënë këqyrjen e vendit të ngjarjes, teksa po bëhet i mundur edhe nxjerrja e trupave të pajetë.

09:47

Konfirmohet viktima e parë nga zjarri në Berat

Është konfirmuar viktima e parë nga zjarri në Berat në Shqipëri, që përfshiu tri banesa, raporton Top Channel.

Po raportohet se mund të ketë edhe dy viktima tjera.

61-vjeçari Jani Vangjeli ka humbur jetën në zjarrin, që shpërtheu gjatë natës në banesën e tij. Zjarri është përhapur edhe në dy banesa tjera.

Të afërmit e Vangjelit thonë se mund të ketë edhe dy viktima tjera, një prej tyre djali i Janit, Mateo Vangjeli.

09:16

Përfshihen nga flaka tri shtëpi në Berat, dyshohet për tre persona të vdekur

Dyshohet se tre persona kanë vdekur nga zjarri që përfshiu tri shtëpi në qytetin e Beratit. Zjarri thuhet se shpërtheu gjatë natës së hënë ku J.V, R.S dhe P.N dyshohet se vdiqën brenda shtëpive të bllokuar.

Të afërmit treguan për Topchannel se si kuptuan ngjarjen.

“Në orën 12:50 kuptuam. Këtu gjetëm flakë dhe thuhet se kanë vdekur tre persona. S’di t’i them rrethanat, ata kishin një rezistencë që gatuanin dhe mos ndoshta ishte ajo”, ka deklaruar njëri nga familjarët.

Ende nuk është dhënë ndonjë njoftim policor në lidhje me ngjarjen.