Në një aheng familjar në fshatin Polac në Skenderaj, sot është konfiskuar një armë, ka njoftuar Fexhrije Pllana, zyrtare për informim publik te Drejtoria Rajonale e Policisë në Mitrovicë.
Një i dyshuar është intervistuar. Ai dyshohet se ka shtënë me armë. Ai është liruar me procedurë të rregullt.
“Sot rreth orës 11:05, Policia ka pranuar informacion për të shtëna me armë zjarri në fshatin Polac-Skenderaj. Njësitet policore në kuadër të Stacionit Policor në Skenderaj, mbi bazën e informacionit fillestar kanë ndërmarrë veprime të shpejta policore, ku pas një kohe të shkurtër kanë identifikuar vendin nga ku ishin dëgjuar të shtënat, me ç’rast në vendin e ngjarjes ku kishte aheng familjar, në cilësi të provave materiale kanë konfiskuar një armë të shkurt ( revole) me gaz, një karikator, dy fishek dhe katër gëzhoja. Në cilësi të të dyshuarit është intervistuar S.X., 29 vjeçar, i cili dyshohet se ka shtënë me armë në aheng familjar. Pas procedurave intervistuese me urdhër të prokurorit të rastit, i dyshuari është liruar në procedurë të rregullt dhe i është iniciuar rasti ’’përdorim i armës apo mjetit të rrezikshëm’’ dhe ‘’mbajtje në pronësi, kontroll apo në posedim të paautorizuar të armëve”, është njoftuar.
Nga Drejtoria e Policisë Rajonale po ashtu është njoftuar për arrestimin e një 18-vjeçari për vjedhjen e një biçiklete para dy dite.
© KOHA. Të gjitha të drejtat janë të rezervuara.
