Prokuroria Themelore në Gjilan, ka kërkuar nga gjykata kompetente në Gjilan caktimin e masës së arrestit shtëpiak ndaj të dyshuarit F.D., i cili dyshohet se ka kryer veprën penale ‘’Fajdeja’’.
Sipas njoftimit, i dyshuari ka shfrytëzuar gjendjen e vështirë materiale të viktimës duke i dhënë borxh, e pastaj duke i kërkuar kthimin e parave me kamatë prej 30 për qind.
“Ekziston dyshimi i bazuar se, i dyshuari F.D., duke shfrytëzuar gjendjen e vështirë materiale të të dëmtuarit E.I., në periudha të ndryshme kohore i ka dhënë para me fajde, në vlerë prej 226,000.00 euro, me qëllim që pastaj t’ia kërkonte me kamatë prej 30%, me ç’rast vlera e përgjithshme sipas marrëveshjes që i dëmtuari kishte për t’ia kthyer të dyshuarit ishte 294,800.00 euro”, thuhet në njoftim.
I dyshuari, me vendim të prokurorit të shtetit gjendet nën masën e ndalimit 48 orësh.
