Rritja e tatimit në pronë përplas pushtetin me opozitën në Podujevë
Këshilltarë të LVV-së dhe ata të LDK-së në Podujevë patën përplasje në Kuvendin Komunal rreth propozimit për faljen e tatimit në pronë për qytetarët e kësaj komune. Propozimi i partisë në pushtet ishte që atyre t’u faleshin 100 eurot e para të tatimit të sivjetmë, e ai i LDK-së që borxhi për këtë periudhë të falej në tërësi. E pas një debati të gjatë, propozimi i Lëvizjes Vetëvendosje në pushtet e mori miratimin e shumicës së kuvendarëve në Podujevë
Rritja e tatimit në pronë ka përplasur kuvendarët e pushtetit me ata të Lidhjes Demokratike në opozitë në Podujevë.
Dy propozime rreth tatimit në pronë i janë paraqitur Kuvendit Komunal në seancën e së martës. Ai i Vetëvendosjes që ishte në linjë me qëndrimin e ministrit të Financave, Hekuran Murati, për faljen e 100 eurove të para të tatimit për vitin 2023 dhe i LDK-së që i propozoi nivelit qendror faljen e tërësishme të tatimit të sivjetmë për qytetarët.
Debati nxiti fillimisht kërkesa nëse Kuvendi Komunal duhet të falë borxhe apo që këtë t’ia rekomandojë nivelit qendror.
“Unë dje i kam rekomanduar Kuvendit këtë pikë se s’ka qenë. Dhe unë kam shkuar në mënyrë ligjore qysh e parasheh ligji dhe rregullorja. Do të thotë, Komiteti ka të drejtë t’i rekomandojë Kuvendit. Kuvendi sot ka të drejtë të nxjerrë një deklaratë ose një rekomandim dërguar Ministrisë. Madje-madje, unë kam hyrë në uebfaqe të Ministrisë dhe pa marrë konfirmim nga komuna, hyni këqyrni, pa marr konfirmim nga Komuna nuk ka të drejtë Ministria ta bëjë këtë ndërhyrje”, ka thënë Haki Rudari, shef i grupit të këshilltarëve të PDK-së.
Kuvendarë të LDK-së thanë se propozimi i Vetëvendosjes ka ndryshuar nga ai që ishte propozuar në KPF, ku, sipas tyre, kërkohej vendim për faljen e borxheve e jo rekomandim, siç po theksohet në Kuvend.
“Lidhja Demokratike, gjegjësisht grupi i këshilltarëve të Lidhjes Demokratike, propozon që ky Kuvend sot në rend pune ta ketë hartimin, gjegjësisht miratimin e një deklarate, të jem i qartë, i një deklarate që ndajmë shqetësimin qytetar dhe të apelojmë te niveli qendror për faljen e borxheve në plotësi, gjegjësisht mos-hyrja në fuqi e Ligjit që e parasheh tatimin, gjegjësisht tatimin, atë vlerësimin që i është bërë bazës tatimore”, ka deklaruar Naim Çunaku, këshilltar komunal i LDK-së.
Në përkrahje të propozimit të këshilltarit Naim Çunaku, doli edhe ajo e AAK-së, Mrika Thaçi.
E kryetari i Komunës së Podujevës, Shpejtim Bulliqi, tha që edhe nëse është gabuar në Komitet, me rëndësi është ajo që do të votohet në Kuvend.
“Ju a po doni të na qitni në lajthitje si Kuvend Komunal a po doni për të zgjidhur problem? Ne po e çojmë një kërkesë, një rekomandim për Ministrinë e Financave për të shqyrtuar mundësinë, se nuk e dimë a i fal a s’i fal, për ta shqyrtuar mundësinë për faljen e atyre borxheve. Nëse i fal, do të jetë e mirë për qytetarët tanë, për juve, për neve dhe për të gjithë. Prandaj, mos e komplikoni situatën, se s’keni nevojë për të komplikuar”, ka thënë Bulliqi.
Bashkim Syla, shefi i grupit të këshilltarëve të Partisë Demokratike, që është në bashkëqeverisje në Podujevë, tha se Kuvendi i Kosovës duhet të marrë vendim për kthimin e normës së tatimit në pronë në nivelin e 2022-tës, pasi që falja e 100 eurove nuk përbën zgjidhje.
Kuvendi Komunal e miratoi me shumicë votash propozimin e LVV-së për t’i rekomanduar nivelit qendror faljen e 100 eurove të tatimit në pronë të të gjithë qytetarëve të Podujevës.
