Gjetjet e Auditorit përplasin pushtetin e opozitën në Ferizaj
Gjetjet e ZKA-së janë bërë sebep për kritika e akuza ndërmjet pushtetit lokal dhe opozitës, në mbledhjen e Kuvendit Komunal në Ferizaj, të mërkurën. Sipas ZKA-së, Komuna e Ferizajt ka keqmenaxhuar paranë publike në disa fusha. Në nëntë raste komuna jashtëligjshëm kishte ekzekutuar pagesa nëpër kategori joadekuate, në vlerë prej 694 mijë e 46 eurosh
Zyra Kombëtare e Auditimit (ZKA) ka publikuar raportin e pasqyrave financiare për Komunën e Ferizajt, për vitin 2021, në të cilin ka listuar një varg shkeljesh.
Gjetjet e ZKA-së janë bërë sebep për kritika e akuza ndërmjet pushtetit lokal dhe opozitës, në mbledhjen e Kuvendit Komunal në Ferizaj, të mërkurën.
Diskursi është ashpërsuar derisa po debatohej rreth gjetjeve dhe shkeljeve të evidentuara në raport.
Sipas ZKA-së, Komuna e Ferizajt ka keqmenaxhuar paranë publike në disa fusha. Në nëntë raste komuna jashtëligjshëm kishte ekzekutuar pagesa nëpër kategori joadekuate, në vlerë prej 694 mijë e 46 eurosh. Krahas kësaj, paratë për subvencione dhe transfere dhe paratë për mallra dhe shërbime ishin paguar për investime kapitale.
“Komuna te projekti ‘Riparimi i trotuareve me kubëza’ kishte shpërblyer me kontratë operatorin ekonomik (OE), i cili nuk i kishte plotësuar të gjitha kriteret e përcaktuara me dosje të tenderit. Komuna kishte përdorur procedurë të negociuar për projektin ‘Rregullimi i kanalizimit në fshatin Kosinë’, me arsyetimin se problemi i kanalizimit në fshatin Kosinë ishte emergjent, edhe pse KRPP-ja kishte dhënë një opinion se Komuna nuk duhet të përdorë procedurë të negociuar, sepse problemi me kanalizimin në fshatin Kosinë ishte për komunën nga viti 2013”, thuhet në raportin e Auditorit.
Sipas këtij dokumenti, Komuna nuk kishte përgatitur plan vjetor as për subvencionimin e OJQ-ve.
“Në tetë pagesa të testuara në vlerë prej 390,696€ kemi identifikuar se komuna ka përdorur fondet nga projektet për qëllime tjera nga ajo për të cilin ishin planifikuar, pa i zbatuar procedurat dhe kriteret për transferim dhe rialokim të ndarjeve buxhetore nga një projekt kapital në një tjetër. Si pasojë e vonesës në pagesën e detyrimeve financiare Komuna ishte detyruar të paguante shpenzime shtesë prej 550,082€ në emër të procedurës kontestimore/përmbarimore apo interesit për pagesë të vonuar”, thuhet më tej në raport.
Sipas Auditorit, Komuna nuk kishte arritur që të bënte verifikimin e 20 për qind të pronave të tatueshme dhe nuk ka bërë shqyrtimin e ankesave brenda afatit të përcaktuar kohor.
Ndërkaq në nëntë raste Auditori ka vërejtur se menaxherët e kontratave nuk kishin përgatitur planin për menaxhimin e kontratës.
Flamur Istrefi, shef i grupit të kuvendarëve nga radhët e LDK-së, ka akuzuar ekzekutivin se gjatë vitit të kaluar jashtëligjshëm kishte punësuar dhjetëra zyrtarë me kontrata të veçanta duke marrë për bazë ngjyrimet politike e familjare.
“Të gjithë punëtorët e angazhuar janë punësuar pa u udhëhequr procedurat e prokurimit. Pra, 41 punëtorë janë vetëm këtë vit dhe po të shikojmë për tërë mandatin del që janë punësuar mbi 400 zyrtarë me kontrata të veçanta pa asnjë kriter. Për t’i punësuar këta 400 punëtorë janë anashkaluar me mijëra të tjerë që i plotësojnë të gjitha kriteret, por nuk u është dhënë as mundësia e konkurrimit. Po ashtu, Komuna gjatë vitit 2021 nuk kishte arritur që t’i regjistronte edhe 22 të punësuar në listën e pagave të cilët kishin kontrata të rregullta të punës”, ka thënë Istrefi.
Me tone kritike kanë folur edhe përfaqësues të LVV-së.
Shqipe Jashari ka thënë se kjo qeverisje po i keqpërdor dhe po i keqmenaxhon paranë dhe pasurinë publike.
“Kemi mosregjistrim të pasurive dhe prezantim jo të plotë të tyre në planin vjetor. Komuna në regjistrin kontabël nuk ka regjistruar as blerjet e pasurisë kapitale dhe jokapitale në vlerë prej 2 milionë e 134 mijë eurosh, ku përfshihen asfaltimi i rrugëve lokale, ndërtimi i objekteve arsimore, shëndetësore e të tjera. Në anën tjetër, pagesat për blerjen e tokës në vlerë prej 8 mijë e 858 eurosh në regjistrin e tokës janë regjistruar në vlerë prej 32 mijë eurosh duke i mbivlerësuar tokat me mbi 23 mijë euro”, ka kritikuar ajo.
Në anën tjetër, Sebahate Ajeti-Sadiku, drejtoreshë për Financa në Komunën e Ferizajt, ka thënë se gjatë vitit të kaluar Komuna ishte në krizë financiare, andaj janë detyruar t’i ndërpresin një varg projektesh kapitale.
“Realisht opozita gjithherë kritikon, megjithatë shkak determinues i opinionit të Auditorit ka qenë mosfunksionimi i sistemit E-pasuria. Këtë problem nuk e kemi vetëm ne si Komunë e Ferizajt, por e kanë mbi 50 për qind të komunave të territorit të Kosovës, sidomos mendimin e kualifikuar të Auditorit e kanë marrë komunat e mëdha”, ka thënë Ajeti.
Ajo ka sqaruar se Komuna nuk ka keqmenaxhuar paranë publike, por se telashet janë ndërlidhur me borxhet e kontratave kolektive të mësimdhënësve në vlerë prej mbi 3 milionë eurosh. Andaj, ka thënë se, në këto procese është dëmtuar edhe Komuna me shpenzime përmbarimore.
