Arbëri

38 mijë banorë të Lipjanit do të mbesin pa ujë të enjten

Kompania Rajonale e Ujësjellësit, “Prishtina”, ka njoftuar të martën se më 11 gusht, e enjte, 38 mijë banorë të qytetit dhe fshatrave të Lipjanit do të mbesin pa ujë të pijshëm nga ora 11:00 deri më 15:00.

Sipas njoftimit të KRU “Prishtina”, furnizimi me ujë të pijshëm në atë periudhë do të jetë i pamundur për shkak se do të ketë ndërprerje të furnizimit me energji elektrike nga ana e KEDS-it.

“Pa furnizim me energji elektrike mbesin: Objekti Administrativ i ujësjellësit në Lipjan, Stacioni i pompimit në Lipjan që furnizon me ujë të pijshëm Lipjanin dhe gjashtë fshatra (Jeta e Re, Grackë e vjetër, Suhadoll, Hallaq i Madh, Ruvc i Ri dhe Ruvc i Vjetër), Stacioni i pompimit në fshatin Konjuh që, furnizon 16 fshatra ( Gadime e Epërme, Gadime e Ulët, Gllavicë, Marevc, Babush, Qallapek, Bujari, Banullë, Gllogovc, Janjeva, Teqe, Gushtericë e Epërme, Gushtericë e Ulët, Dobrotin, Livagjë, Knjuh dhe në tërësi QMI-ja, Stacioni i pompimit në fshatin Sllovi”, thuhet në njoftimit.

Pa furnizim me ujë të pijshëm, siç njofton “Prishtina”, për shkak të ndërprerjes së furnizimit me energji elektrike nga ana e KEDS-it, mbesin 10.500 konsumatorë ose 38.000 banorë të qytetit dhe fshatrave të komunës së Lipjanit.