Kosovë

Banorët në ish-objektin e “Feronikelit” sërish kërkojnë nga komuna largimin e një ashensori përgjatë dhomave të gjumit

Komuna e Lipjanit
 

Një pjesë e banorëve në ish-kompleksin e “Feronikelit” në Lipjan mëngjesin e së hënës i janë drejtuar edhe një herë komunës me arsyetim se një biznes privat i cili e ka privatizuar një pjesë objektit ka vendosur një ashensor përgjatë dhomave të tyre të gjumit pa pëlqimin e banorëve.

Kjo, sipas banorëve po ua prishë qetësinë familjare. Përveç kësaj, sipas banorëve ky biznes po ua dëmton edhe korridoret e banesave duke vendosur dyer të veçanta për hyrje dhe po ua dëmton edhe pjesën e epërme të pullazit. Madje banorët po ashtu janë ankuar se ky biznes ka vendosur edhe kamera të sigurisë pa pëlqimin e tyre duke i shkelur të drejtat e njeriut dhe ligjet tjera. Banorët gjatë ditës janë takuar me nënkryetarin në detyrë të Komunës së Lipjanit Fauz Xhemajli, i cili i është zotuar se së shpejti edhe inspektorati komunal do të dalë në vendin e ngjarjes për ta kryer punën e tyre profesionale. Rreth kësaj çështje banorët u janë drejtuar edhe MMPHI-së, por edhe institucioneve të tjera me peticione, por deri më tash nuk janë ndërprerë punimet megjithëse niveli qendror pati dhënë disa rekomandime për t’i ndërprerë punimet.