14 perditesime
19:08

Incidentet e vogla përcjellin zgjedhjet në Podujevë

Pandemia me të cilën po ballafaqohet vendi, ka detyruar qytetarët e Podujevës që këtë të diel të votojnë në rrethana krejtësisht të tjera krahasuar me herët e shkuara.

Ndonëse jo të gjithë me maska dhe me distancën e rekomanduar, procesi zgjedhor megjithatë përfundoi në Podujevë. E qytetarët, si gjithmonë kanë thënë se presin për ndryshime dhe më shumë vende të punës, raporton KOHA.

Por as ky proces zgjedhor nuk kaloi pa incidente. Një person madje është arrestuar në një qendër të votimit pasi kishte fotografuar votën. E tensione dhe akuza pati edhe mes partive kryesisht për presionin që u bëhej votuesve.

Komunën gjatë ditës e vizitoi edhe ministri i Shëndetësisë, Armend Zemaj, për të parë siç tha, respektimin e masave anti-pandemi.

“Janë katër ekipe inspektorësh, bashkërisht me Policinë e Kosovës, janë disa masa dhe ndëshkime që janë marrë këtu dhe në Mitrovicën e Veriut”, ka thënë Zemaj.

Në këto zgjedhje është mundësuar që të votojnë edhe qytetarët të cilët kanë qenë të izoluar apo të infektuar me Covid-19.

Qytetarët e Podujevës të drejtën e tyre për të votuar e ushtruan në 45 Qendra të Votimit me gjithsej 115 vendvotime, e të drejtë vote kishin 87 mijë e 381 persona.

 

17:30

Votuesi i LDK-së në Podujevë fotografon votën

Një person në Podujeve pas votimit, ka fotografuar votën. Këtë e ka dokumentuar duke e fotografuar edhe letërnjoftimin e tij. Në bazë të ligjit dhe rregullore së KQZ-së, ky veprim është i ndaluar dhe i dënueshëm.

Në mbledhjen e sotme të Komisionit Qendror të Zgjedhjeve është thënë se nuk kanë pranuar ndonjë parregullsi.

Kryesuesja e KQZ-së, Valdete Daka, ka thënë se procesi i votimit në Komunën e Podujevës dhe të Mitrovicës së Veriut është duke u zhvilluar qetë.

16:01

VV-ja në Podujevë: Shoferi i Nexhmi Rudarit po bën presion ndaj votuesve

Dega e Lëvizjes Vetëvendosje në Podujevë është ankuar se në qendrën e votimeve në shkollën “Shaban Shala”, është duke qëndruar brenda gjatë tërë kohës Burim Rudari, shoferi i kandidatit të LDK-së, Nexhmi Rudari dhe po bën presion ndaj votuesve.

“Ftojmë organet e rendit që të ndërmarrin masa ndëshkuese ndaj këtij personi dhe kujtdo tjetër që për qëllim ka manipulimin e procesit zgjedhor”, thuhet në reagimin e LVV-së – dega Podujevë.

15:14

Zemaj thotë se janë ndëshkuar personat që nuk kanë respektuar masat anti-COVID në qendrat e votimit

Ministri i Shëndetësisë, Armend Zemaj, pas vizitës në Podujevë ku pa sa po respektohen masat anti-COVID gjatë procesit zgjedhor, ka thënë se ka pasur ndëshkime për personat të cilët nuk kanë respektuar masat.

Ai ka kërkuar nga qytetarët që të respektojnë rekomandimet e dhëna nga institucionet shëndetësore.

Zemaj tha se personat që mbesin në qendrat e votimit mund të qarkullojnë, teksa shtoi se nuk janë për të penguar zgjedhjet në asnjërën nga dy komunat ku sot po votohet për zgjedhje të kryetarit.

Gjatë ditës së sotme, KOHA ka raportuar se në qendrën “Isa Boletini” në Podujevë, nuk po respektohej distanca sociale mes votuesve, ku grumbull i tyre është parë brenda ambientit.

15:05

Policia njofton për dy raste të dyshimit të fotografimit të votës në Podujevë

Policia e Kosovës ka njoftuar se ka pranuar dy thirrje nga kryesuesja e qendrës së votimit në shkollën “Isa Boletini” në Podujevë, për dy raste që ndërlidhen me dyshime të fotografimit të votës.

“Në dyja rastet Policia ka shoqëruar në stacionin policor personat ndaj të cilave janë ngritur dyshimet e pretenduara me qëllim të ndriqit të rrethanave. Ndërkaq nuk është raportuar për ndonjë incident tjetër i cili ka kërkuar intervenim të Policisë”, thuhet në njoftimin e Policisë.

Nga Policia e Kosovës është thënë se janë në gatishmëri dhe se janë angazhuar rreth 400 zyrtarë policorë me detyra specifike në këtë proces.

“Që nga orët e hershme të mëngjesit Policia e Kosovës ka ndërmarrë të gjithë hapat e duhur për të kontribuar në mbarëvajtjen e zgjedhjeve të jashtëzakonshme për kryetar komune në Podujevë. Marrë parasysh numrin e qendrave të votimit, policia ka angazhuar rreth 400 zyrtar policor me detyra specifike në këtë proces, duke mos llogaritur këtu edhe numrin e zyrtarëve të tjerë të angazhuar me detyra të përgjithshme në atë territor”, thuhet nga Policia.

14:35

DnV: Zgjedhje të qeta dhe të rregullta, por me respektim jo të kënaqshëm të masave antiCovid

Demokracia në Veprim (DnV) ka vlerësuar se procesi i deritanishëm zgjedhor në Podujevë e Mitrovicë të Veriut është zhvilluar pa incidente apo parregullësi që mund të cenojnë integritetin e këtij procesi.

Por, sa i përket zbatimit të masave për parandalimin e përhapjes së koronavirusit, DnV ka konsideruar se nuk janë respektuar sa duhet.

“Përgjithësisht, DnV vlerëson se procesi i deritanishëm zgjedhor është zhvilluar pa incidente apo parregullsi që mund të cenojnë integritetin e këtij procesi. Dalja e votuesve në Komunën e Podujevës është deri më tani është në nivele të kënaqshme, marrë parasysh situatën me pandeminë si dhe trendet e daljes në zgjedhjet lokale të vitit 2017. Ndërsa, në Mitrovicë të Veriut është raportuar për pjesëmarrje më të ulët në zgjedhje. Sa i përket zbatimit të masave për parandalimin e përhapjes së pandemisë, DnV konsideron që masat dhe procedurat e parapara të votimit përmes udhëzimit të KQZ-së, nuk janë respektuar sa duhet. Përkundër faktit që KQZ ka angazhuar ekipe monitoruese të zbatimit të masave anti-COVID, të cilat kanë qenë të pranishme në pothuajse të gjitha qendrat, vëzhguesit e DnV-së kanë raportuar për respektim të pjesshëm të mbajtjes së maskës në mënyrë adekuate. Kjo është vënë re më shumë në radhët e komisionerëve. Po ashtu në shumë raste është raportuar për mosrespektim të distancës fizike, si në radhët e votuesve, ashtu edhe të komisionerëve. Ndërsa, dezinfektimi i duarve është masa e cila është respektuar më së paku, sipas vëzhguesve tanë. Bazuar në vlerësimin tonë, KQZ nuk ka shfrytëzuar të gjithë kapacitetin e disponueshëm lidhur me hapësirat e votimit, meqë rast në disa qendra të votimit ka mbingarkim me votues, që ka rezultuar edhe me pamundësi për mbajtje të distancës, ndërsa objekte tjera publike (shkolla) nuk janë marrë fare në shfrytëzim për proces të votimit. Sa i përket hapësirave, vlen të përmendet që në shumë raste është evidentuar numër më i madh i vëzhguesve, në kundërshtim me vendimin e KQZ-së që ka paraparë vetëm një vëzhgues për entitet në vendvotim”, thuhet nga DnV-ja.

Po ashtu nga DnV-ja është thënë se pasaktësia e listës së votuesve vazhdon të mbetet sfidë në proceset zgjedhore.

“Vëzhguesit e DnV-së kanë raportuar për shqetësime të ngritura nga qytetarët për praninë e personave të vdekur në lista të votimit, si dhe janë evidentuar pakënaqësi lidhur me ndërrimin e qendrave të votimit të votuesve. Sa i përket ushtrimit të së drejtës së votimit, disa qytetarë janë ankuar që komisionerët nuk ua kanë lejuar të drejtën e votimit për shkak të skadimit të afatit në dokumente identifikuese, çështje kjo e cila nuk është adresuar si duhet nga KQZ dhe institucionet tjera relevante. DnV ju bën thirrje qytetarëve që kohën e mbetur t’a shfrytëzojnë të drejtën e tyre të votimit, në përputhje me manualet për parandalimin e koronavirusit. Po ashtu, DnV kërkon nga komisionerët e subjekteve politike që të garantojnë mbarëvajtje të procesit të votimit, si dhe t’i kushtohet vëmendje e veçantë procesit të numërimit”, thuhet nga DnV.

14:09

DFK: Tentime për votime familjare e përdorim të maskave me logo të partive

Përfaqësuesi i Rrjetit të OJQ-ve “Demokracia Fillon Këtu” (DFK), Shemsi Jashari, ka thënë se gjatë monitorimit të zgjedhjeve në Podujevë kanë vërejtur tentime për votime familjare e përdorim të maskave me logo të subjekteve politike.

Në një prononcim për KOHË-n, Jashari ka thënë se në fshatin Obrançë ka pasur tendencë për t’i vulosur fletëvotimet anash në mënyrë që të identifikohen votat se për cilin subjekt politik kanë shkuar, por që më sipas tij, kjo është evituar pas një debati mes komisionerëve në atë shkollë.

“Sot gjatë ditës e kemi filluar monitorimin qysh prej mëngjesi. Ajo çka kemi vërejtur dhe kemi pranuar raporte prej terrenit ka qenë se ka pasur vonesa të vogla në hapje të vendvotimeve, por jo të theksuara për aspekte administrative derisa janë bërë gati. Përndryshe prej incidenteve që janë raportuar prej terreni është në shkollën në fshatin Zhiti, ku një vëzhgues i LDK-së ka pasur maskën e vendosur me numrin e subjektit politik LDK për çka ka pasur reagime prej subjekteve tjera dhe është larguar ajo maskë”, ka thënë Shemsi Jashari.

Sipas tij, në shkollën “Shaban Shala” në qytet ka pasur tri tentime për votime familjare, të cilat gjithashtu janë evituar pas reagimeve që ka pasur nga komisionerët aty.

“Në shkollën në Gllamnik janë raportuar tri votime me asistencë të familjarëve që janë lejuar prej komisionerëve me votuar. Dhe në fshatin Obrançë komisioneri i cili ka pasur obligim të vulosë fletëvotimit ka dashur që të vulos fletëvotimin anash jashtë rregullave, se ato vulosen në mes, që të identifikohen ato vota se për cilin subjekt politik është votuar. Pastaj është bërë një debat mes komisionerëve edhe është evituar edhe kjo mundësi që të mos vulosen në atë mënyrë”.

Ndërkohë, përfaqësuesi i KKZ-së, Islam Demolli ka thënë se ata nuk merren me ankesa, por me këtë çështje merret PZAP-ja. Sipas DFK-së, pas orës 11 është vërejtur një numër më i madh i votuesve pothuaj në të gjitha qendrat e votimit.

13:28

Grumbull i madh i votuesve në qendrën “Isa Boletini” në Podujevë, nuk respektohet distanca

Një grumbull i madh i votuesve gjenden në qendrën e votimit në shkollën “Isa Boletini” në Podujevë.

Nuk po respektohet distanca, ndërsa është parë edhe prezencë e shtuar e zyrtarëve policorë. Sipas menaxhmentit të kësaj qendre, më e madhja e votimit në Podujevë, fluksi më i madh ka qenë pas orës 13:00. 

Në lidhje me çështjen e maskës së vëzhguesit, nga menaxheri i kësaj qendre është mohuar të ketë ndodhur në këtë qendër. Por Fehmi Zeqiri ka pranuar se ka pasur tollovi të qytetarëve dhe mosrespekitim të masave antiCovid.

Ai grumbullimet e njerëzve i ka arsyetuar me faktin se kjo është qendra më e madhe në komunën e Podujevës, ku janë rreth 14 mijë votues. Ai po ashtu ka konfirmuar rastin e fotografimit të votës.

Ministri i Shëndetësisë, Armend Zemaj, ka ardhur në Podujevë për të parë sa po respektohen masat anti-COVID, bashkë me inspektorë sanitarë.

 

12:55

MPB-ja njofton se veturat e saj i janë dhënë në shfrytëzim KQZ-së

Ministria e Punëve të Brendshme (MPB) ka reaguar ndaj akuzave se veturat e saj po përdoren për manipulim të zgjedhjeve lokale në Podujevë e Mitrovicë të Veriut.

MPB-ja ka reaguar duke thënë se veturat e saj janë dhënë në shfrytëzim të Komisionit Qendror të Zgjedhjeve (KQZ) për organizimin e zgjedhjeve.

“Ju bëjmë me dije se kjo është një praktikë që gjatë organizmit të zgjedhjeve në Kosovë, KQZ, kërkon nga Ministria e Administratës Publike, mbështetje me vetura për organizmin të zgjedhjeve. Tashmë meqë ish-ministria e Administratës Publike është shuar në Ministrisë e Punëve të Brendshme, është përgjegjësi e MPB-së që t’iu jep në shfrytëzim veturat për KQZ-në. Ju njoftomë se këto vetura janë dhënë në shfrytëzim me miratimin e Sekretarit të Përgjithshëm të MPB-së, z. Lulzim Ejupi”, thuhet nga MPB-ja.

Edhe kryetarja e KQZ-së, Valdete Daka, kishte konfirmuar se veturat janë në shfrytëzim të KQZ-së dhe se në to është logoja e KQZ-së. Por nga dega e LVV-së në Podujevë është reaguar duke i quajtur të pavërteta deklarimet e Dakës se në veturat janë logot e KQZ-së.

“Asnjë nga këto vetura të cilat i kemi ilustruar edhe me fotografi nuk bartin asnjë shenjë apo identifikim të KQZ-së dhe si të tilla paraqesin keqpërdorim me veturat zyrtare dhe presion mbi votuesit. Kësisoj, prania e veturave qeveritare pa asnjë shenjë identifikimi të KQZ-së është tendencë për manipulim të procesit zgjedhor. Pra, për aq kohë sa këto vetura janë me logo të MPB-së, për Lëvizjen VETËVENDOSJE! konsiderohen presion mbi votuesit. Kjo është tërësisht e papranueshme”, thuhet në reagimin LVV-së – dega Podujevë në Facebook.


13:13 - Kapet një person në Podujevë duke fotografuar votën

Një person është kapur në Podujevë duke fotografuar votën. Menaxheri i qendrës së votimit në shkollën “Isa Boletini” në Podujevë, ka treguar për Ekonomia Online, për parregullsinë e evidentuar në këtë qendër.

Ai tregoi se personi ka fotografuar fletëvotimin dhe se rasti është paraqitur në Polici.

“E patëm një rast i cili ka bërë fotografinë e fletëvotimit dhe është e ndaluar dhe rasti është paraqitur në Polici. Policia pastaj po merret me procedurat e mëtutjeshme. Nëse i referohemi dy orë më parë ka qenë 7% ndërsa kjo gjendje ka ndryshuar, dhe se fluksi i qytetarëve është mjaft i madh. Unë e kam listën e votuesve që i bie se janë 14 mijë qytetarë që kanë të drejtën e votimit, dhe konsiderohet si qendra më e madhe e votimit dhe më e rëndësishme është se gjithçka po shkon mirë”, tha Zeqiri.

“Procesi ka ecur normalisht dhe kemi të bëjmë me një proces zgjedhor krejtësisht të rregullt. Është një proces i vështirësuar, por edhe sensibilizimi e ka bërë të veten dhe i kemi marr të gjitha masat mbrojtëse. IKShPK veç i ka njoftuar qytetarët që janë të infektuar me Covid-19 që edhe ata e kanë të drejtën e votimit”.

Marrë parasysh numrin e qendrave të votimit, policia ka angazhuar 380 zyrtarë policorë me detyra specifike në këtë proces, duke mos llogaritur këtu edhe numrin e zyrtarëve të tjerë të angazhuar me detyra të përgjithshme në atë territor, Policia më pas përmes një komunikate.

12:15

PDK-ja i paraqet disa parregullsi që sipas saj kanë ndodhur nga LDK-ja e VV-ja në procesin zgjedhor

Partia Demokratike e Kosovës kërkon që qytetarët të votojnë lirshëm, pa presion.

Rafet Llapashtica nga kjo parti ka kritikuar LDK-në e VV-në për parregullsi në procesin e votimit.

Ai ka përmendur vëzhguesin e LDK-së i cili ishte parë me maskë me numrin e kandidatit të partisë dhe veturat zyrtare me të cilat ai thotë se LDK-ja po përpiqet t’i manipulojë zgjedhjet.

Ai tha se nga VV-ja po bëhet presion tek qytetarët për të votuar.

“PDK i denoncon disa parregullsi të LDK-së e VV-së të cilat bien ndesh. vëzhgues të LDK-së me llogo e numër të LDK-së shihen në qendra të votimit. Veturat zyrtare që duhet të jenë në parking zyrtarët e LDK-së po i bartin, për të manipuluar, VV po bëjnë presion në qendra të votimit për të votuar”, tha ai në konferencë për media.

“Veturat janë të komunës dhe të nivelit qendror, ato duhet të jenë në parking në ditë vikendi e jo në rrugë e sidomos në kohë zgjedhjesh nuk duhet të përdoren”, ka përfunduar ai.

11:32

LVV-ja në Podujevë: Veliu me vetura të ministrisë angazhohet për manipulim të zgjedhjeve

Lëvizja Vetëvendosje dega në Podujevë, ka akuzuar ministrin e Punëve të Brendshme, Agim Veliu, se po angazhohet për manipulim të zgjedhjeve.

Nga LVV-ja është thënë se në shkolla të ndryshme në Podujevë, janë parë deri 16 vetura të MPB-së të cilat thotë se po keqshfrytëzohen nga LDK-ja e Agim Veliut, duke implikuar rëndë procesin zgjedhor.

“Agim Veliu me vetura të ministrisë̈ angazhohet për manipulim të zgjedhjeve në Podujevë Në shkolla të ndryshme të Podujevës ku edhe po zhvillohet procesi zgjedhor, në secilën nga ato janë̈ parë deri tani 16 vetura të Ministrisë̈ së Punëve të Brendshme të cilat po keqshfrytëzohen nga LDK e Agim Veliut duke implikuar rëndë̈ procesin zgjedhor. Resurse dhe mekanizma të ndryshme shtetrore po keqpërdoren nga LDK për t’i arritë qëllimet e tyre. Veturat e MPB nën direktivat e Agim Veliut janë kthyer në shërbim të fushatës zgjedhore. Veprimet e tilla janë̈ rreptësishtë të ndaluara. Ftojmë̈ prokurorinë̈ që sa më parë të merret me këtë̈ rast dhe ndërhyrjet flagrante që po vijnë̈ veçmas nga Ministria e drejtuar prej Veliut. Njëherë ftojmë̈ KQZ-në që të reagojë sa më parë në mënyrë̈ që të mos lejojë deformimin dhe abuzimet e vazhdueshme që po organizohen nën autoritetin zyrtar të shtetit nga LDK”, ka shkruar LVV-ja - dega Podujevë në Facebook. 

Image

 

11:22

Bulliqi: Qytetarët të dalin në numër sa më të madh, sepse e rrisin legjitimitetin e kryetarit

Kandidati i LVV-së për zgjedhjet komunale në Podujevë, Shpejtim Bulliqi, ka votuar në fshatin Llugë.

Pasi ka dhënë votën ai ka thënë se qytetarët duhet të dalin sa më masovisht për të rritur legjitimitetin e kryetarit.

“E dhash votën për të ardhmen e qytetarëve tanë nga ky i ftoj qytetarët të dalin masivisht të votojnë. Është ditë e veçantë për qytetarët, sot janë të gjithë të barabartë si burri ashtu edhe gruaja, si i pasuri ashtu edhe i varfëri. Menaxherët e shkollave dhe vëzhguesit të bëjnë punën e tyre. Qytetarët të dalin në numër sa më të madh, sepse e rrisin legjitimitetin e kryetarit”, ka thënë Bulliqi.

10:25

Rudari voton në përcjellje të familjarëve të tij

Kandidati për kryetar të komunës së Podujevës, Nexhmi Rudari, i cili vjen nga radhët e Lidhjes Demokratike të Kosovës, ka hedhur votën e tij për zgjedhjet lokale.

Rudari tha se është ditë e jashtëzakonshme marrë parasysh edhe gjendjen pandemike në vend. Ai ka bërë apel që votuesit të respektojnë masat anti-COVID, megjithatë në vendvotim vetë ai kishte marrë dy nipat e tij, derisa u pa se me ta iu drejtua kutisë së votimit.

“Është ditë e jashtëzakonshme sepse zgjedhjet janë të jashtëzakonshme por edhe situata është e jashtëzakonshme për shkak të pandemisë. Të kryejnë qytetarët obligimin të votojnë, por të mbajnë distancën e maskat, ta kalojmë bashkë këtë”, tha Rudari.


10:25 - Fetahu thërret qytetarët të dalin në votim: Askush nuk është i kënaqur më këto 20 vjet qeverisje

Kandidati i Partisë Demokratike të Kosovës për kryetar të Podujevës, Naim Fetahu, ka votuar në shkollën fillore “Esat Mekuli”, në fshatin Dobratin.

Pas hedhjes së votës së tij, Fetahu ka thënë se këto janë zgjedhjet më të rëndësishme për komunën e Podujevës dhe ka ftuar të gjithë llapjanët që të marrin pjesë në votim.

“Zgjedhjet lokale janë më të rëndësishme se ato nacionale. Këto zgjedhje, na prekin direkt ne që jetojmë në këtë komunë. Janë zgjedhje për mirëqenien tonë, për punësimin e qytetarëve tanë, për përmirësimin e kushteve për mësimdhënësit tanë e mbështetjen e sipërmarrësve. Janë zgjedhje të cilat vendosin për të rinjtë, gratë, të moshuarit e kategoritë e luftës dhe të gjithë së bashku. Unë jam i bindur që asnjëra nga këto kategori nuk janë të kënaqura me këto 20 vjet sesi është sjellë pushteti ndaj tyre. Prandaj, unë ftoj të gjitha këto kategori, të gjithë qytetarët llapjanë, që sot të dalin në mënyrë sa më masive në zgjedhje dhe të bëjnë ndryshimin e vërtetë i cili do të përmirësoj rrënjësisht jetën e tyre”, ka thënë Naim Fetahu./ EO

10:03

VV-ja thotë se në një qendër votimi në Podujevë nuk i është lejuar hyrja vëzhguesit të saj

Qendra e Lëvizjes Vetëvendosje në Podujevë ka akuzuar se në qendrën e votimit në Metehi (1830e), i është ndaluar hyrja vëzhguesit të VV-së pa ndonjë arsye.

“Menaxheri i Qendrës së Votimit në Metehi (1830e), e ndalon vëzhguesin e LV-së pa arsye dhe nuk e lejon të hyjë ta kryej detyrën që i është dhënë si vëzhgues. Lëvizja VETËVENDOSJE! fton organet kompetente të merren me rastin sa më parë”, thuhet në postimin në Facebook të qendrës në Podujevë të VV-së.

09:46

PDK: Parregullsi në Podujevë, vëzhguesi ka mbajtur maskë me numrin e kandidatit të LDK-së

Sipas Partisë Demokratike të Kosovës një parregullsi është regjistruar në procesin zgjedhor në Podujevë.

PDK thotë se një nga vëzhguesit në shkollën “Sami Frashëri” e cila është pikë vendvotimi, ka mbajtur maskë me numrin e kandidatit të LDK-së për kryetar, gjatë procesit të votimit.

Vëzhguesi është detyruar ta heqë maskën.

“Kanë filluar edhe parregullsitë e para në procesin zgjedhorë në Podujevë. Gjatë mëngjesit të sotëm, një vëzhgues i LDK-së në njërën nga pikat e vendvotimeve, respektivisht në shkollën “Sami Frashëri” të fshatit Zhiti, ka mbajtur gjatë gjithë kohës maskën me numrin e kandidati të LDK-së, Nexhmi Rudari, gjatë procesit të votimit. Kjo parregullsi është shënuar edhe nga vëzhguesit e zgjedhjeve dhe personi në fjalë është detyruar ta heqë maskën”, ka thënë PDK.