AMC dhe Cycle Kosovo dhurojnë shtretër për foshnje në Neonatologjinë në Mitrovicë

AMC dhe Cycle Kosovo dhurojnë shtretër për foshnje në Neonatologjinë në Mitrovicë

09 December 2019 15:19

“Action for Mothers and Children” bashkë me organizatorët e “Cycle Kosovo for Children” dorëzuan 15 shtretër për foshnje në repartin e neonatologjisë në Mitrovicë, si rezultat i mungesës së madhe të shtretërve për të porsalindurit.

Shtretërit u siguruan nga fondet e ngritura nga turneu vendor “Cycle Kosovo for Children” e cila është një ngjarje bamirëse vjetore e çiklistëve vendor për të ngritur fonde për fondacionin humanitar “Action for Mothers and Children”.

Këtë vit “Cycle Kosovo for Children” përfundoi me sukses për të gjashtin vit me radhë ku morën pjesë rreth 30 çiklistë në rrugëtimin 4-ditor dhe u siguruan rreth 10,000 euro përmes kontributeve të kompanive dhe individëve, dhe përmes fushatave online.

“Një prej qëllimeve tona si AMC është ulja e vdekshmërisë së foshnjave, andaj jemi shumë të lumtur që edhe ky donacion i këtyre shtretërve për të sapolindurit në Spitalin e Mitrovicës do të ndikoj në përmirësimin e shërbimeve spitalore, rrjedhimisht në përmbushjen e misionit të organizatës sonë. I falënderoj shumë çiklistët nga ‘Cycle Kosovo for Children’ për iniciativën dhe mbështetjen ndaj organizatës sonë tash e gjashtë vite me radhë. Mbështetje të ngjashme me pajisje mjekësore do të vazhdojnë edhe më tutje edhe për Spitalin e Mitrovicës, por edhe për spitale të tjera ku identifikohen nevojat”, u shpreh Vlorian Molliqaj nga “Action for Mothers and Children”.

“Kemi kënaqësinë të jemi prezent sot dhe të shohim se sa po ndihmon lëvizja jonë të cilën po e organizojmë për gjashte vite tani. Jemi falënderues ndaj miqve dhe donatorëve të cilët çdo herë na ndihmojnë në përmbushjen e misionit tonë dhe mbështetin punës se mirë të ‘Action for Mothers and Children’”, theksoi Albion Hadri nga “Cycle Kosovo for Children”.

© KOHA. Të gjitha të drejtat janë të rezervuara.

Komentet

Shto koment

Të ngjashme