Kosovë

Shtyhet procesi mësimor në dy shkolla në Pejë shkaku i rinovimit

Shtyhet procesi mësimor në dy shkolla në Pejë shkaku i rinovimit

Procesi mësimor në 28 shkolla fillore dhe gjashtë të mesme në Komunën e Pejës ka filluar të hënën, përveç në dy shkolla fillore në qytetin e Pejës, “Lidhja e Prizrenit” dhe “Xhemajl Kada”, në të cilat për shkak të rinovimeve ende të papërfunduara, procesi mësimor do të nisë me një javë vonesë.

“Gjatë pushimeve verore kemi punuar intensivisht për t’i kryer rinovimet me kohë, por në shkollat ‘Xhemajl Kada’ dhe ‘Lidhja e Prizrenit’ nuk kemi arritur t’i përfundojmë me kohë. Në këto dy shkolla mësimi do të fillojë më 9 shtator, kurse të gjitha orët e humbura të kësaj jave do të zëvendësohen”, tha drejtori i Arsimit, Besim Avdimetaj, shkruan sot Koha Ditore.