Në këtë gjendje, 140 nxënës nga fshatrat Kishnicë dhe Shushicë, zhvillojnë procesin mësimor.

Objekti që ishte dedikuar për minatorët e minierës së Kishnicës në Komunën e Graçanicës, që nga viti 1966 është duke shërbyer si shkollë për nxënësit e këtyre fshatrave, raporton KTV.

Nxënësit dhe mësimdhënësit të cilët përballen çdo ditë me këtë gjendje, tregojnë se është e vështirë ta zhvillojnë procesin mësimor në mungesë të kushteve elementare.

Ministria e Arsimit, në vitin 2015, kishte bartur disa projekte nën menaxhimin e Ministrisë së Administratës Publike, e një ndër projektet ka qenë edhe ndërtimi i objektit të kësaj shkolle.

Pas shumë kërkesave dhe ankesave në Ministrinë e Arsimit, në vitin 2016 kishte filluar ndërtimi i objektit të ri, por që ishte ndërprerë shkaku i neglizhencës nga ana e kompanisë kontraktuese.

Në një përgjigje me shkrim, zyrtarë të Ministrisë së Arsimit kanë thënë që kanë kërkuar raport të detajuar nga Ministria e Administratës Publike, por nuk kanë marrë përgjigje.

Në anën tjetër, zëvendësministri i Administratës Publike ka thënë që në qershor do të përfundojnë të gjitha punimet.

Drejtori i kësaj shkolle, Vezir Bytyçi, thotë se nëse në shtator nuk do të mund ta shfrytëzojnë objektin e ri dhe do ta bojkotojnë mësimin.

Vlera e përgjithshme e gjithë projektit të shkollës në fshatin Kishnicë është rreth 950 mijë euro.

Në shtator të 2014-s, shkaku i kushteve jo të mira në këtë shkollë, është bojkotuar mësimi për 3 javë.