Biznesmeni nga Gjakova thotë të jetë dënuar padrejtësisht nga Gjykata për vjedhje të rrymës

Alberta Hashani Alberta Hashani 23 March 2019 19:23

Shpëtim Bokshit në pranverën e 2013-s, iu ngrit aktakuza për vjedhje të energjisë.

Prokuroria, duke u bazuar në verifikimin e njësorit elektrik të bërë në Qendrën e Kalibrimit të KEDS-it, kishte ngritur akuzën se Bokshi kishte dëmtuar pllombat e njësorit, raporton KTV.

Edhe pse ato kishin qenë në rregull në momentin e tërheqës së njësorit nga biznesi i tij.

Megjithëkëtë, ai ishte shpallur i fajshëm nga Gjykata Themelore në Gjakove si dhe ajo e Apelit.

Mirëpo, avokati i Bokshit, Teki Bukoshi, e kishte dërguar lëndën në Gjykatën Supreme, e cila e kishte kthyer në pikën zero, nga ku ishte kërkuar riverifikimi i njësorit.

Kësaj radhe, në Qendrën e Kalibrimit të Agjencisë së Metrologjisë.

Kohavisoni ka siguruar një shkresë, të Agjencisë së Metrologjisë, e cila tregon se në rastin e parë të verifikimit nuk kishin qenë prezentë në tërheqjen e njësorit nga klienti.

Për këtë, e kishin mohuar konstatimin e KEDS-it, duke thënë se ishte shkelur ligji që në fillim të procesit.

E me riverifikimin e bërë këtë herë nga agjencia, Gjykata Themelore në Gjakovë ka treguar se është shpallur i pafajshëm Bokshi, por nuk kanë pranuar të deklarohen lidhur me gjykimin e parë.

Bokshi për këtë ishte gjobitur nga KEDS-i në vlerë të 10 mijë eurove.

Zyrtarët e KEDS-it nuk kanë dhënë përgjigje kur janë pyetur për këtë rast.

Kohavisioni ka raportuar në të kaluarën se vetëm gjatë vitit 2017 dhe 2018, janë mbi 3000 qytetarë, të cilëve u është ngritur akuza për vjedhje të energjisë.

Kjo ishte bërë, edhe përkundër që ekspertët e Agjencisë së Metrologjisë nuk kishin qenë të pranishëm në tërheqjen e njësorëve dhe në verifikimin e tyre.

© KOHA. Të gjitha të drejtat janë të rezervuara.

Komentet

Shto koment

Të ngjashme