Komuna e Podujevës që gjashtë muaj e ka lënë qytetin pa objekt të bibliotekës, pasi e kishte rrënuar objektin e ish-Komitetit, në të cilin gjendej edhe biblioteka, për t’i hapur vend ndërtimit të “Rrugës së xhamisë”, e deri tash nuk i ka bërë asnjë zgjidhje.
Lëvizja Vetëvendosje sot ka ndërmarrë një aksion për t’u dalë nxënësve në ndihmë duke u ndarë lektura shkollore, transmeton Koha.net.
E për këtë çështje zyrtarët komunalë të Podujevës nuk kanë kthyer asnjë përgjigje, megjithëse pyetjet u janë dërguar nga 27 dhjetori i vitit të kaluar, ka raportuar Koha Ditore ditë më parë.
Në një postim në Facebook, Vetëvendosje në Besianë shkruan se, “për shkak të ndërtimit të rrugës Qendër-Rrethi për Kërpimeh buzë Lumit Llap është rrënuar biblioteka e qytetit tash e 6 muaj dhe nuk është në shërbim të lexuesve. Lëvizja Vetëvendosje këtë shqetësim e ka ngritur edhe në Kuvendin Komunal disa herë ndërsa kryetari Veliu shprehet i lumtur për rrënimin e objektit të bibliotekës së qytetit”.
“Aktivistët e Lëvizjes Vetëvendosje në Besianë sot bënë shpërndarjen e lektyrave shkollore për nxënësit e shkollave fillore duke u munduar që sadopak t’u dalim në ndihmë të gjithë atyre lexuesve të cilët përmbyllën gjysmë vjetorin e parë dhe janë në pushime dimërore”, thuhet në postimin e VV-së në Facebook, derisa kanë bashkangjitur edhe disa fotografi nga ngjarja.
