Erërat e forta lanë pa rrymë shumë qytetarë Foto: Ilustrim

Erërat e forta lanë pa rrymë shumë qytetarë

25 October 2018 16:36

Erërat e forta që kanë përfshirë Kosovën mbrëmjen e së mërkurës, kanë shkaktuar dëme në rrjetin elektrik duke lënë pa energji shumë vende.

Si pasojë e erës edhe gjatë ditës së sotme kanë vazhduar që shumë shtylla të jenë të dëmtuara, e përçues të këputur.

Përveç dëmeve që u shkaktuan në rrjetin elektrik gjithandej Kosovës, deri më tani institucionet e shërbimeve emergjente kanë thënë se nuk ka dëme të tjera materiale.

Për më shumë se pesë orë pa energji elektrike kishin mbetur banorët e Komunës së Obiliqit. Banori i kësaj komune Sabri Miftari, thotë se ndërprerja e energjisë çdo herë kur ka erëra po bëhet e padurueshme.

Ai thotë se nëse vazhdohet kështu, gjatë dimrit do kenë shumë probleme.

“Kjo në qoftë se ndodh kështu në dimër nuk kemi çka me hi, diku 4-5 orë kemi qenë pa rrymë”, tha ai për KP.

Kurse, banori tjetër i kësaj komune, Selim Krasniqi, thotë se në lagjen ku ai banon ndërprerje të rrymës ka pasur për 2 orë.

Krasniqi shprehet se në këtë komunë çdo herë kur ka erëra ka ndërprerje të energjisë elektrike, e kjo sipas tij, për shkak të rrjetit të vjetërsuar.

“Rrymë nuk kemi pasur mbrëmë 2 orë, shyqyr që nuk u bë më keq se ka qenë një erë e fuqishme. Pas dy orëve ka ardhur rryma dhe është qetësuar gjendja... Këtu moti telat janë të vjetërsuar”, tha ai.

Se në këtë komunë nuk ka pasur dëme të tjera përveç atyre në rrjetin elektrik, e ka thënë edhe drejtori për shërbime publike dhe emergjencë, Naim Miftari.

Sipas tij, në disa fshatra të kësaj komune ka pasur dëmtim të shtyllave elektrike, por që ai shprehet se janë rregulluar mbrëmë.

“Ende nuk kemi ndonjë informatë lidhur me dëmet materiale nëse ka pasur apo jo. I kemi organizuar disa ekipe janë në terren për të vlerësuar nëse ka ndonjë dëme të shkaktuar nga erërat e mbrëmshme. Përveç disa shtyllave elektrike me ç’rast kanë mbetur rreth dy orë qytetarët e Obiliqit pa rrymë elektrike...Janë rregulluar mbrëmë”, tha ai.

Në anën tjetër, Komandanti i Brigadës Profesionale të Zjarrfikësve për rajonin e Prishtinës, Latif Zeka, ka thënë se gjatë ditës së djeshme nuk kanë pasur ndonjë thirrje për intervenim.

Megjithatë, ai thotë se për raste të tilla janë gjithmonë në gatishmëri.

Zëdhënësi i KEDS-it Viktor Buzhala, ka bërë të ditur se si pasojë e erërave të forta ka pasur një varg prishjesh në rrjetin elektrik, por ai shprehet se ekipet në terren i kanë sanuar disa nga dëmet.

“Duhet ta dini që mbrëmë ka pasur erëra të forta që kanë shkaktuar një varg prishjesh, sidomos në Dukagjin dhe Anamoravë. Prishjet janë sanuar në afat rekord falë angazhimit maksimal të punëtoreve të KEDS-it që ishin vazhdimisht në terren, por kanë mbetur prishje në nivel lokal, që përfshijnë numër të vogël të konsumatorëve, pasi kemi shumë shtylla të thyera dhe përçues të këputur”, ka thënë ai.

Buzhala ka bërë të ditur se KEDS ende nuk ka përpiluar raport të detajuar për të ditur dëmet që janë shkaktuar. Madje ata nuk kanë informacione se sa orë qytetarët e Kosovës kanë qenë pa energji elektrike.

Komentet

Shto koment

Të ngjashme