Naim Jakaj nga Instituti “Musine Kokalari” ka thënë se sipas një raporti të bazuar në të dhënat e Administratës Tatimore të Kosovës, afër 20 mijë persona marrin pagë vetëm 80 euro në Kosovës.
“Nga raporti ynë del që Komisioni për Shëndetësi dhe Mirëqenie Sociale i ka mbikëqyr vetëm dy ligje, një për shëndetin mendor dhe një nuk po kujtohet. Por kur vjen te siguria në punë, sidomos në dy vitet e fundit që ka qenë pandemia, nuk është bërë asnjë monitorim. Kjo është skandaloze, se si një komision parlamentar nuk monitoron asgjë për sigurinë në punë, mund të jetë për arsye të ndryshme, por komisioni nuk ka mbërrit me i ngrit çështjet, së paku në debat parlamentar. Qytetarët asnjëherë nuk e dinë për nivelin e pagës as në sektorin privat, as në publik. Sipas një raporti që e kemi bërë më herët, afër 20 mijë persona marrin pagë 80 euro në Kosovë dhe nuk dihet për çka. Në Ligjin e Punës, paga minimale është 130 euro. Mund të jenë punëtor fizik, punëtor të pastrimit. Kjo i bie që ATK-ja dhe Kuvendi nuk e dinë që mijëra njerëz paguan kaq për shërbime të caktuara. Kjo pagesë është e kundërligjshme, sipas Ligjit të Punës, që nuk ka ndryshuar që nga viti 2011”, deklaroi Jakaj në “Interaktiv” të KTV-së.