Në Prishtinë do të prezantohet për herë të parë globalisht pajisja “Arduino Uno Q” – pajisja më e re e nivelit të lartë që demokratizon qasjen në modele të inteligjencës artificiale dhe që ua mundëson të gjithëve të eksperimentojnë e të mësojnë me kosto të lirë për modelet e AI-së.
Siç kanë njoftuar organizatorët e konferencës “Software Freedom Kosova (SFK) 2025”, në këtë konferencë, folës kryesor do të jetë bashkëthemeluesi i platformës globale “Arduino”, David Cuartielles. Konferenca do të mbahet nga 24 deri më 26 tetor.
Sipas organizatorëve, emri i njohur ndërkombëtarisht për inovacionin në teknologjitë open-source do të ndajë përvojën e tij shumëvjeçare në arsim dhe dizajn interaktiv me komunitetin lokal të teknologjisë dhe studentët kosovarë.
“Më 25 tetor, në orën 10:30 në FIEK Prishtinë, Cuartielles do të prezantojë për herë të parë globalisht pajisjen Arduino Uno Q - pajisjen më të re high-tech që e demokratizon qasjen në AI modele, duke ua mundësuar të gjithëve të eksperimentojnë dhe të mësojnë në lidhje me AI modele me kosto shumë të ulët: rreth 40 euro pajisje. Sot, komuniteti global i Arduinos numëron mbi 30 milionë përdorues aktiv, nga studentë e deri te zhvillues e edukatorë që ndajnë të njëjtën filozofi: teknologjia duhet të jetë e hapur, e përballueshme dhe në shërbim të krijimtarisë”, thuhet në njoftim.
Edicioni i dhjetë i SFK-së vjen me temën “Do Androids Dream?”, që trajton temat shumë interesante të open-source AI dhe hardware, e organizuar nga FLOSSK (Free Libre Open Source Software Kosova).
Organizatorët kanë thënë se gjatë konferencës do të ketë folës nga e gjithë bota dhe vendi dhe kompani të njohura ndërkombëtare si TomTom dhe openSuse, që do të jenë të pranishme me standet e tyre.
Arduino Uno Q është pllakë elektronike që përdoret për të kontrolluar pajisje, sensorë apo motorë në projekte elektronike. Është ndër modelet më të njohura dhe përdoret në arsimim e projekte teknologjike.